बैतडी : बैतडीमा बिहीबारदेखि कोरोना परीक्षण सुरु भएको छ । जिल्ला अस्पताल बैतडीमा पीसीआर प्रयोगशाला स्थापना भएसँगै कोरोना परीक्षण सुरु भएको जिल्ला अस्पतालका प्रयोगशाला इन्चार्ज श्यामराज जोशीले बताए ।
जिल्ला अस्पताल बैतडीमा पीसीआर प्रयोगशाला स्थापना भएपछि बैतडीका मात्रै नभएर दार्चुलाका नागरिकलाई पनि सजिलो हुने भएको छ । प्रयोगशालामा दैनिक २ सयदेखि ३ सय स्वाब परीक्षण गर्ने सकिने प्रयोगशाला इन्चार्ज जोशीले बताए ।
सुदूरपश्चिम प्रदेश सरकारको करीब ४० लाखको लागतमा जिल्ला अस्पातलमा पीसीआर ल्याब स्थापना भएको अस्पताल व्यवस्थापन समिति अध्यक्ष पार्वती भट्टले बताइन् । उनले भनिन्, 'हाम्रो जिल्लामा पीसीआर ल्याब संचालनमा आएपछि अब कोरोना परीक्षणको लागि सजिलो भएको छ ।'
जिल्ला अस्पतालमा प्रयोगशाला स्थापना भएपछि कोरोना मात्रै नभएर अन्य रोगको निदानका लागि पनि सहज भएको स्वास्थ्य कार्यालयका प्रमुख योगेशप्रसाद भट्टले बताए । उनले भने, 'पीसीआर प्रयोगशाला कोरोना परीक्षणका लागि मात्रै होइन् । यो अन्य रोगहरुको निदानका लागि पनि सहयोग गर्छ ।'
प्रयोगशालाको प्रदेशका सामाजिक विकासमन्त्री कृष्णराज सुवेदी र उद्योग, पर्यटन, वन तथा वातावरणमन्त्री माया भट्टले एक कार्यक्रमबीच संयुक्तरुपमा उद्दघाटन गरेका हुन् ।
प्रतिक्रिया दिनुहोस !
