थाइल्याण्डमा राजतन्त्रको विरोध गर्दै सडकमा उत्रिए जनता
बैंकक : थाइल्याण्डमा राजसंस्थाको पुनर्संरचना तथा राजाका अधिकार कटौती लगायत माग गर्दै हजारौँले प्रदर्शन गरेका छन् ।
यस क्रममा राजा महा भलिरालंकोर्नको शासनशैलीको व्यापक विरोध भएको छ । केही अघिदेखि नै जारी प्रदर्शनमा पछिल्लो समय राजतन्त्र विरुद्ध खुलेर विरोध हुन थालेको हो । थाइल्याण्डमा राजतन्त्रको विरोध गर्न प्रतिबन्ध लगाइनुका साथै दण्डनीय मानिन्छ ।
राजा भलिरालंकोर्न स्वदेश नरहेका बेला उनको कार्यशैलीको विरोध भइरहेको छ । यद्यपि उनले केही प्रतिक्रिया दिएका छैनन् । कोरोनाभाइरसको संक्रमण थाइल्याण्डमा व्यापक रुपमा फैलिरहँदा राजा भने जर्मनीको महंगो रिसोर्टमा आइशोलेट हुन आफ्नो जम्बो टोली लिएर युरोप पुगेका थिए ।
केही दिनदेखि नै व्यापक रुप लिँदै गरेको थाइल्याण्डको आन्दोलन विस्तार हुँदै जानसक्ने स्थानीय मिडियाको टिप्पणी छ । थाइल्याण्डमा यसअघि पनि राजतन्त्रको विरोध हुने गरेको थियो । तर प्रदर्शनहरु सामसुम हुने गरेका थिए । यसपटक कोरोनाभाइरस संक्रमण फैलिरहँदा त्यसको सामना गर्नुको सट्टा विदेश जाँदा राजाको चर्को आलोचना भएको छ ।