यूकेमा कोरोना संक्रमण बढ्न थालेपछि थप कडाइ
लण्डन : बेलायतमा कोरोनाभाइरसको संक्रमण बढेसँगै लकडाउन कडा पारिने भएको छ ।
प्रधानमन्त्री बोरिस जोन्सनले बिहीबार सबैलाई घरबाटै काम गर्न आग्रह गरेका छन् । साथै रेष्टुरेण्ट, बार, पब लगायत भिडभाड हुने व्यवसायमाथि प्रतिबन्ध लगाउने भएका छन् । विज्ञहरुले बेलायतमा दोस्रो लहरको कोरोनाभाइरस फैलिएको बताएपछि प्रधानमन्त्री जोन्सनले कडाइ गरेका हुन् ।
संसदलाई सम्बोधन गर्दै जोन्सनले थप कडाइ गर्ने भएका हुन् । तर बेलायतमा गत मार्चदेखि लागेको पूर्ण र राष्ट्रव्यापी लकडाउनलाई हेरफेर गर्दैछन् । विज्ञहरुले बेलायतमा नयाँ कदम नचालेको खण्डमा आगामी साता कोरोनाभाइरस संक्रमित र मृतकको संख्या अनपेक्षित रुपमा बढ्नसक्ने चेतावनी दिएका छन् ।
हाल बेलायतमा कोभिड १९ का बिरामी हरेक दिन ६ हजारका दरले बढ्दै छन् । विभिन्न कार्यालय खुलेर कामदारहरु काममा फर्कन थालेको केही हप्तापछि नै जोन्सनले सम्भव भएकाजति सकेसम्म घरबाटै काम गरिदिनुपर्ने भन्दै आग्रह गरे । युरोपमा सबैभन्दा कोभिडका बिरामी भएको देश नै बेलायत हो । साथै विश्वमा पाचौँ धेरै संक्रमित भएको देशको रुपमा चिनिएको छ ।