भारतमा कृषि विधेयकको विरोध गर्दै देशभरका किसानहरु आन्दोलित
नयाँदिल्ली : भारतको संसदले हालै पास गरेको कृषि विधेयकको विरोध गर्दै विभिन्न सहरमा ठूलो संख्यामा किसानहरु सडकमा उत्रिएका छन् ।
शुक्रबार उनीहरुले विरोधस्वरुप विभिन्न राजमार्ग बन्द गर्नुका साथै चक्काजाम गराए । साथै विधेयक फिर्ता लिनुपर्ने किसानहरुको माग छ । छाता संगठनको रुपमा ‘अल इन्डिया किसान संघर्ष संयोजन समिति’को आह्वानमा देशभरका ३ सय ५० भन्दा धेरै किसान संगठनहरुले शुक्रबार एक साथ प्रदर्शन गरेका थिए ।
किसान आन्दोलनलाई प्रतिपक्षी दल कांग्रेस, आरजेडी र त्रिणमूल कंग्रेस सहित १० वटा केन्द्रीय ट्रेड यूनियनले समर्थन र साथ दिएका छन् । कांग्रेसका नेताहरुले कृषि कानुनले भारतका किसानहरुलाई दासमा परिणत गर्ने भन्दै प्रदर्शनमा सहभागिता जनाएका छन् ।
राहूल गान्धी, प्रियंका गान्धी, भद्र र रणदीप सूर्जेवाला लगायत नेताहरुले विधेयकको विरोधमा आवाज उठाएका छन् । साथै भारत बन्दमा समर्थन दिएका छन् । तर कतिपय स्थानमा आन्दोलनकारी किसानहरुमाथि भारतीय जनता पार्टीका कार्यकर्ताहरुले सांघातिक हमला गरेका छन् । भाजपाका कार्यकर्ताहरुको हूलले प्रदर्शन रोक्दै पार्टी र सरकारको पक्षमा नारावाजी गर्दै प्रदर्शनकारीहरुमाथि हमला गरेका हुन् । यस क्रममा सयौं आन्दोलनकारी किसानहरु पक्राउ पनि परेका छन् ।
भारतमा कृषि सम्बन्धी विभिन्न माग राख्दै यसअघि पनि पटक पटक थुप्रै आन्दोलन हुँदैआएका छन् । यससँगै भारतका ग्रामिण भूभागका किसानहरु हरेक वर्ष हजारौँको संख्यामा आत्महत्या गर्ने गरेको तथ्यांक विभिन्न निकायले सार्वजनिक गरेका छन् ।