यूकेमा लकडाउन विरोधी प्रदर्शनकारी र प्रहरीबीच झडप
लण्डन : बेलायतमा लकडाउन विरोधी प्रदर्शनको क्रममा १० जना पक्राउ परेका छन् । साथै झडपको क्रममा चार सुरक्षा अधिकारी घाइते भएका छन् ।
लण्डन महानगरीय प्रहरीका अनुसार त्राफलगर स्क्वायरमा भेला भएका १० हजार भन्दा धेरै प्रदर्शनकारीहरुलाई तितरबितर पार्न लाठीचार्ज गर्दा झडप भएको थियो । बेलायतमा कोरोनाभाइरस संक्रमितको संख्या बढेपछि सरकारले यही सातादेखि लकडाउन कडा गरेको हो । जसको विरोधमा शनिबार आम नागरिक सडकमा उत्रिएका छन् ।
‘दुखद रुपमा हाम्रा चार अधिकृत घाइते भएका छन्, दुई जनालाई अस्पतालमा उपचारका लागि लगियो,’ महानगरीय प्रहरीले ट्वीटरमा जनाएको छ । गत साता पनि यस्तै प्रदर्शन हुँदा दर्जनौँ प्रहरी अधिकृत घाइते भएका थिए । शनिबार प्रदर्शनको नेतृत्व गर्नेमध्ये डेभिड इक पनि थिए । जो एक प्रसिद्ध षड्यन्त्रको सिद्धान्तवादी थिए ।
भीडका केही प्रदर्शनकारीले भने कोभिड १९ को खोप विरुद्ध संकेत दर्शाउने प्लेकार्ड बोकेका थिए । प्रधानमन्त्री बोरिस जोन्सनले भने शनिबार विश्व स्वास्थ्य संगठनको खोप विकास गर्ने प्रयासलाई साथ दिनुपर्ने भन्दै आग्रह गरेका थिए । यही साता जोन्सन नेतृत्वको सरकारले ६ जना भन्दा धेरै मानिसबीच भेला हुन, रेष्टुरेण्ट, बार खोल्न कडाइ गरेको छ ।