अवैध नेटवर्किङ धन्दा : २१ कम्पनीका ५० जनालाई पक्राउ गर्न सीआईबीलाई पत्र
असोज १२, २०७७ सोमबार १५:०:०
काठमाडौं : अवैध नेटवर्किङ धन्दा गरिरहेको विभिन्न कम्पनी तथा व्यक्तिउपर वाणिज्य आपूर्ति तथा उपभोक्ता संरक्षण विभागले गोप्य छानबिन थालेको छ। प्रारम्भिक अनुसन्धानका क्रममा शंकास्पद देखिएका २१ कम्पनीका ५० व्यक्तिलाई पक्राउ गरी सहयोग गरिदिन विभागले नेपाल प्रहरीको केन्द्रीय अनुसन्धान ब्युरो (सिआइबी) लाई पत्र पठाएको छ। ती कम्पनी र व्यक्तिको धन्दाबारे उजुरीपरेपछि विभागले छानबिन अघि बढाएको हो।
उजुरी उपर छानविन एवं अनुसन्धानका लागि विभागले प्रहरीलाई ति संस्थाका व्यक्तिलाई पक्राउ गरिदिन प्रहरीको सहयोग मागेको विभागका महानिर्देशक नेत्रप्रसाद सुवेदीले अन्नपूर्ण अनलाइनसँग बताए।उपत्यकासँगै झापालगायत तराईका केही जिल्लाका मानिसहरुले आफू नेटवर्किङबाट ठगीमा परेको भन्दै विभागमा उजुरी दिएका छन्।
विभागले प्रहरीलाई ती व्यक्ति पक्राउ गरेपछि अनुसन्धान आफैंले गर्ने जनाएको छ। विभागले दुई वटा कम्पनी इन्दुस बिभा र पशुपति बिभाका संचालकहरुलाई अघिल्लो हप्ता पक्राउ गरि धरौटीमा छाडेको र उनीहरुको व्यवसायमाथि सिलबन्दी गरी थप अध्ययन भईरहेको जनाएको छ। यी कम्पनीसँग जोडिएका केही लाई बुझ्न बाँकी रहेको र सिल गरेको ठाउँमा प्रमाण संकलनको कार्य जारी रहेको विभागले जनाएको छ।
विभागका महानिर्देशक सुवेदीले अन्नपूर्ण अनलाइनसँग भने,‘हामीसँग भएको विवरण थप अनुसन्धान गर्न र आवश्यक परे पक्राउ गरि विभागलाई बुझाउन सिआईबीलाई पत्र पठाएका छौं। अनुसन्धानका क्रममा थप कम्पनी र व्यक्तिहरु पनि पर्न सक्छन।’
नेपालमा नेटवर्किङ व्यवसायको अवैध धन्दा गर्नेमा अधिकांश विदेशी कम्पनी देखिएका छन्। नेपालमा दर्ता हुँदा नेपाली कम्पनीको नाममा गर्ने तर ति कम्पनीलाई विदेशी कम्पनीबाटै प्रत्यक्ष सहयोग भईरहेको विभागको दावी छ। विदेशी वस्तुहरु नेपालमा बिक्री गरेर विदेशमै पैसा जानेगरी व्यवसाय संचालन गरिरहेको बुझाई विभागको छ। उजुरीमा परेका कम्पनीले वस्तुको प्रत्यक्ष बिक्री वितरणमात्रै गरेको हो वा त्यो भन्दा बाहेकका अरु अवैध गतिविधि पनि संचालन गरेका छन भन्नेतर्फ विभागको अनुसन्धान केन्द्रीत भएको जानकारी महानिर्देशक सुवेदीले दिए। उनका अनुसार अनुसन्धानको दायरमा आएका कम्पनीले कानुनअनुसार विभागमा दर्ता र इजाजत लिनुपर्ने छ।
विभागले सिआईबीलाई लेखि पठाएका कम्पनीले इजाजत बिनै वस्तुको प्रत्यक्ष बिक्री वितरण गरेको, अनलाईन बिजनेस मेम्बरसिप र अनलाईन क्रिप्टोकरेन्सीको कारोबार गरेको आशंका छ। ति कम्पनीले नेपालमा पैसा जम्मा गरेर क्रिप्टोकरेन्सीको पेमेन्ट दुबई, कतार, मलेसिया, अमेरिकालगायत मुलुकबाट भईरहेको दावी विभागको छ।
विभागले आईबोस ग्लोबल इन्टरनेसनल प्रालि (पहिले ग्रिन बुटी), नेचर हब्र्स इन्टरनेसनल प्रालि (पहिले नेचर हर्बो इन्टरनेसनल प्रालि), न्यु विवेक इन्टरप्राइजेज प्रालिले नियमावलीअनुसार व्यापार÷व्यवसाय गर्न अनुमति दिएको छ। त्यस्तै हेल्दी लिभिङ प्रालि, केयर मार्केट इन्टरनेसनल प्रालि, युटर्न इन्टरनेसनल प्रालि र ग्लोबल ओरियन्ट इन्टरनेसनल प्रालिले पनि अनुमति पाएका छन्। यी कम्पनीले पनि गोप्य रुपमा अवैध नेटवर्किङ धन्दा चलाउँदै आएको आशंकामा विभागले गोप्य छानविन थालेको छ।
प्रतिक्रिया दिनुहोस !
