भाजपा सांसदको टिप्पणीः बलात्कार संस्कारबाट मात्रै अन्त्य हुन्‍छ, सरकारबाट हुँदैन

नयाँदिल्ली : भारतको उत्तर प्रदेशस्थित हाथरसमा २० वर्षीया युवतीमाथि सामूहिक बलात्कारपछि हत्याको घटनालाई लिएर यतिबेला भारतको राजनीतिमा नै तरंग पैदा भएको छ ।

प्रभावशाली नेताहरुले पनि यसबारे टिप्पणी गर्न थालेका छन् । यस्तैमा सत्तारुढ दल भारतीय जनता पार्टीका उत्तर प्रदेशका सांसद सुरेन्द्र सिंहले भने उक्त घटनालाई भिन्न तरिकाले टिप्पणी गरेका छन् ।

सांसद सिंहले मंगलबारको उक्त घटनामा पीडित परिवार पनि जिम्मेवार भएको तर्क गरेका छन् । उनले यस्ता घटना कम गर्नुमा आमाबाबु र पीडित युवतीको पनि भूमिका हुने तर्क गरेका छन् ।

‘यो आमा र बाबुको पनि दायित्वको कुरा हो । छोरीहरुलाई असल आनीबानी सिकाएर उनीहरुलाई सांस्कृतिक वातावरण दिनुपर्छ,’ सांसद सिंहले भने । उनले अघि थपेका छन्, ‘म सांसदसँगै शिक्षक पनि हुँ । यस्ता बलात्कारका घटना संस्कृति र संस्कारले मात्रै रोकिन सक्छन् र न कि शासन वा हतियारबाट ।’

उनले युवतीहरु स्वयं संस्कारी भए मात्रै यस्ता दुर्घटना वा अपराध अन्त्य हुने उनको तर्क थियो । साथै त्यसका लागि आमाबाबुले पनि छोरीहरुलाई संस्कार सिकाउनुपर्ने सांसद सिंहले तर्क गरेका थिए ।

‘यो मेरो धर्म हो, सरकारको धर्म तर परिवारको धर्म पनि । सरकारले संरक्षण गर्ने प्रतिवद्धता गर्छ । परिवारले पनि आफ्ना सन्तानलाई असल बानी व्यवहार सिकाउने प्रतिवद्धता गर्नुपर्छ । संस्कार र सरकारले भारतलाई सुन्दर बनाउँछ, यसवाहेक अरु कुनै विकल्प छैन,’ सांसद सिंहको भनाइ थियो । पत्रकारले जब कि, रामराज्य भनेर चर्चा गरिरहँदा किन यस्ता बलात्कारका घटना बढिरहेका छन् ? भनेर सोधेको प्रश्नमा उनले यस्तो जवाफ फर्काएका र्थि ।

भजपाका सांसद सुरेन्द्र सिंह यसअघि पनि यस्ता विवादित अभिव्यक्ति दिने नेताको रुपमा चिनिएका छन् । गत वर्ष उनले नाथुराम गोड्सेको सन्दर्भमा उनले महात्मा गान्धीको हत्या गरेर अपराध नगरेको बरु त्यो एउटा गल्ती मात्रै भएको भनी टिप्पणी गरेका थिए । यस्तै यही वर्षको सुरुमा पश्चिम बंगालकी मुख्यमन्त्री ममता बनर्जीलाई ‘क्रुर हृदयकी महिला’ भन्दै टिप्पणी गरेका थिए ।