नवाज सरिफ र मोदीले नेपालमा गोप्य रुपमा भेटेको पाकिस्तानी अधिकारीको दावी

नयाँदिल्ली : पाकिस्तानका विशेष सल्लाहकार शाहबाज गिलले पूर्वपाकिस्तानी प्रधानमन्त्री नवाज सरिफले भारतीय प्रधानमन्त्री नरेन्द्र मोदीसँग नेपालमा गोप्य रुपमा भेट गरेको दावी गरेका छन् ।

सरिफले आफू प्रधानमन्त्री भएका बेला मोदीलाई काठमाडौँमा भेट गरेको बारे विदेश मन्त्रालयलाई जानकारी नदिएको पनि गिलले आरोप लगाएका छन् । पाकिस्तानी प्रधानमन्त्री इमरान खानले सरिफलाई भारतसँग मिलेर पाकिस्तानी सेनालाई कमजोर बनाउने काम गरिरहेको आरोप लगाएको एक दिनपछि नै उनका सल्लाहकार शाहबाजले यस्तो दावी गरेका हुन् । साथै सरिफको भारतीयहरुसँग व्यापारिक सम्बन्ध रहेको पनि गिलको दावी थियो । नवाज पाकिस्तानविरोधी नभए पनि संकिर्ण सोचका व्यापारी भएको गिलको टिप्पणी थियो ।

‘नवाज सर्रिफ पाकिस्तान विरोधी हुन् भनेर भन्न सक्दिन । तर उनी एक संकिर्ण सोचका व्यापारी हुन् । के पाकिस्तानी व्यापारीले भारतीय प्रधानमन्त्रीसँग भेट्छ ?' गिलले भने । यस्तै बेलायतमा रहेका नवाज सरिफविरुद्ध पक्राउ पूर्जी जारी गरेको पाकिस्तानको कदम बेलायतको अस्वीकृतिसँगै निरर्थक बनेको छ । भ्रष्टाचार अभियोगमा १० वर्षको जेलजीवन बिताएका नवाज उपचारका लागि भन्दै यतिबेला बेलायतमा छन् । अदालतले उनलाई दिएको बिदा सकिँदा पनि उनी लण्डनमै बस्दैआएका छन् ।

अघिल्लो महिना मात्रै इमरान खान नेतृत्वको सरकारले सरिफलाई फरार अपराधी करार गरेको थियो । साथै फिर्ता ल्याउन विदेश मन्त्रालय मार्फत पहल गरेको थियो । तर बेलायतले पाकिस्तानको आन्तरिक राजनीतिसँग जोडिएको विषयमा आफूले दख्खल दिन नमिल्ने प्रतिक्रिया दिएपछि पाकिस्तानको पहल निरर्थक बनेको हो ।

पाकिस्तानी अधिकारीका अनुसार नवाजले केही दिनअघिमात्रै लण्डनस्थित एक देशको दूतावासमा सरिफले भारतीयसँग बैठक गरेका थिए । तर कुन देशको दूतावास भनी खुलाइएको छैन ।

७० वर्षीय नवाज सरिफलाई २०१७ मा दोषी ठहर भइ जेल जीवन बिताउन थालेका हुन् । तर गत वर्षको नोभेम्बरमा उनी अदालतको चार हप्ताको बिदा लिएर उपचारका लागि लण्डन पुगेका थिए । तर पछिल्लो समय अदालतले पटक पटक उपस्थित हुने आदेश दिँदा पनि उनी तप उपचारका लागि भन्दै लण्डनमै छन् । साथै नवाजलाई फिर्ता ल्याउन नसकेको भन्दै पाकिस्तानमा प्रधानमन्त्री इमरान खानको आलोचना पनि हुने गरेको छ ।