बेलारुसमा शासकको विरोध गर्दै एक लाख भन्दा धेरै सडकमा उत्रिए
मिन्स्क : बेलारुसमा सरकारको विरोध गर्दै राष्ट्रपति विरुद्ध एक लाख भन्दा धेरै मानिस सडकमा उत्रिएका छन् ।
लगातार छैटौँ पटक राष्ट्रपतिमा निर्वाचित बनेका अलेक्जेन्डर लुकाशेन्कोले निर्वाचनमा धाँधली गरेको भन्दै प्रतिपक्षी दल सहित आम नागरिक प्रदर्शनमा उत्रिएका हुन् । प्रदर्शनकारीले राष्ट्रपति लुकाशेन्कोको राष्ट्रपति पदबाट तत्काल राजीनामा र राजनीतिक बन्दीको रिहाइ लगायत माग राख्दैआएका छन् ।
राजधानीमा पछिल्लो समय हरेक दिन प्रदर्शन व्यापक बन्दै गएपछि सरकारले उनीहरुलाई पक्राउ गर्नुका साथै सुरक्षा व्यवस्था कडा गरेको छ । प्रहरीले प्रदर्शनकारीमाथि पानीको फोहोरा हान्नुका साथै धरपकड गरेको छ ।
मनवअधिकारवादी संगठनहरुका अनुसार आइतबार मात्रै राजधानीमा एक लाख २० हजार मानिस प्रदर्शनमा उत्रिएका थिए । पछिल्लो दुई महिनादेखि नै राजधानीमा विरोध प्रदर्शन हुँदैआएको छ । गत अगस्ट ९ मा सम्पन्न राष्ट्रपतीय निर्वाचनको परिणाम लुककाशेन्कोको पक्षमा आएपछि प्रतिपक्षी लगायत आम नागरिक आन्दोलित बनेका हुन् ।
लुकाशेन्को बेलारुसका यस्ता शासक हुन् जो २६ वर्षदेखि अर्थात्, ६ पटक लगातार विजयी बनेका छन् । पछिल्लो पटक ८० प्रतिशत मत ल्याएर जितेपछि परिणाम उल्ट्याएको भन्दै प्रतिपक्षी आन्दोलित बनेको हो ।
प्रतिपक्षी दलकी नेत्री स्भियत्लाना सिखानोस्क्याले जम्मा १० प्रतिशत मत पाएको बताइएको थियो । तर उनले मतपरिणाम अस्वीकार गर्दैआएकी छन् । उनले यस मत परिणामलाई पूर्ण रुपमा नियोजित भएको आरोप लगाउँदै आएकी छन् । सिखानोस्क्या आफ्ना पति सिआरीलाई गत मे महिनामा बन्दी बनाइएपछि चुनावमा भाग लिएकी हुन् । सिआरी लोकप्रिय प्रतिपक्षी नेता हुन् ।
निर्वाचनको क्रममा पनि सरकारविरुद्ध प्रदर्शन भइरहेको थियो । जहाँ प्रहरीले हजारौँलाई पक्राउ गरेर थुनेको थियो भने प्रदर्शनलाई बल प्रयोग गरी दबाइएको थियो । बेलारुसीयन प्रदर्शनलाई दबाउन प्रहरीले रबरका गोली प्रहार गर्दैआएको छ । हालसम्म यहाँ १० हजार भन्दा धेरै मानिसलाई प्रहरीले पक्राउ गरी थुनामा राखेको छ । जसमध्ये २४४ जनाविरुद्ध विभिन्न किसिमका आपराधिक मुद्दा लगाइएको छ ।