सुर्खेत : जुम्लामा दुई मूर्तिसहित संकास्पद तीन युवा पक्राउ परेका छन् । प्रसिद्ध चन्दननाथ मन्दिरबाट पाँच वर्ष पहिले चोरी भएको बहुमुल्य मूर्तिमध्ये थप दुई पुरातात्विक मूर्ति फेला परेका हुन् । २०७३ मंसिर ११ गते मन्दिरबाट दर्जनौं बहुमुल्य मूर्ति चोरी भएका थिए । जसमध्ये सोमबार प्रहरीले विष्णु र भगवती सरस्वतीको मूर्ति भेटाएको हो ।
विशेष सूचनाका आधारमा कर्णाली प्रदेश प्रहरी कार्यालयबाट खटिएको टोली र जिल्ला प्रहरी कार्यालय जुम्लाबाट खटिएको संयुक्त टोलीले बिहान १० : १५ बजे चन्दननाथ नगरपालिका–१० बोहोरा गाउँस्थित सुशिल विष्टको खेतको आलीको सुकेको घाँसको थुप्रोमा दोसल्लाले बेरेर राखिएको अबस्थामा मूर्ति फेला परेका हुन् ।
जुम्लाका डीएसपी माधव काफ्ललेका अनुसार दुई थान मूर्तिसँगै उक्त घटनामा संग्लन तीनजना संकास्पद व्यक्तिलाई समेत पक्राउ गरिएको हो । पक्राउ पर्नेमा चन्दननाथ नगरपालिका–१० निवासी ३२ वर्षीय सुशिल विष्ट, तातोपानी गाउँपालिका–८ घर भइ हाल चन्दननाथ नगरपालिका–१० मा बस्ने २८ वर्षीय जयलाल थापा र चन्दनना नगरपालिका–१० कै वर्ष २३ का सुदिप रावल रहेका छन् । पाँच वर्ष पहिले चोरी भएका दर्जनौं मूर्तिमध्ये हालसम्म विभिन्न ठाउँमा करिब २० वटा मूर्ति भेटिएको प्रहरीले जनाएको छ ।
मन्दिरबाट जम्मा के कति मूर्ति चोरी भएका थिए ? कस्ता मूर्ति भेटिए ? भन्ने कुरा अझै एकिन छैन । घटनापछि तत्काल मूर्ति चोरीमा संलग्न मन्दिरका पूजारी चन्द्रमौलेश्वर गिरी र स्थानीय जयकृष्ण आचार्य पक्राउ परेका थिए । तर घटनामा को र कति जना संलग्न थिए भन्ने कुरा खुलेको छैन । मूर्ति चोरीमा संलग्न अझैं केही व्यक्ति फरार रहेको प्रहरीको भनाइ छ ।
मूर्ति चोरी काण्डबारे प्ररीले निरन्तर अनुसन्धान गरिरहेको छ । जुम्लाका प्रमुख जिल्ला अधिकारी भूपेन्द्र थापाले चन्दननाथका बहुमुल्य ऐतिहासिक मूर्ति चोरी काण्डमा संग्लन सबैलाई कानुनी दायरामा ल्याउन प्रहरी, प्रशासनले हरप्रयास जारी राखेको बताए ।
विशेष सूचनाका आधारमा संकास्पद तीन व्यक्ति दुई थान मूर्तिसहित पक्राउ गर्नु पनि प्रहरीको ठूलो उपलब्धि भएको उनको भनाइ छ । साथै प्रजिअ थापाले हिरासतमा रहेका सबैलाई मानव अधिकार हनन हुने खालका कुनैपनि गतिविधि नगर्न सुझाब दिए ।
साथै आ.ब २०७७/७८ को हालसम्म अदालतबाट दोषी ठहर भइ फरार रहेका २४ जना र अनुसन्धानको क्रममा फरार प्रतिवादी २३ जना गरी ४७ जनालाई पक्राउ गरिएको डिएसपी काफ्लले जानकारी दिए । जसमा पक्राउ परेका ४७ जनाबाट ४३ लाख एक हजार ७ सय नब्बे रुपैयाँ जरिवाना र १५ वर्ष तीन महिना २१ दिन कैद असुली गरिएको छ ।
प्रतिक्रिया दिनुहोस !
