परासी : पश्चिम नवलपरासीमा यसवर्ष धान उत्पादनमा कमी आउने भएको छ । कोरोना र बाढीका कारण उत्पादनमा कमी आउने भएको हो । कोरोनाका कारण समयमा सहजरुपमा मलखाद नपाउनु र बाढीका कारण लगाएको धान डुबेपछि धान उत्पादनमा कमी आउने कृषि ज्ञान केन्द्र नवलपरासीले जनाएको छ ।
जिल्लामा कुल २१ हजार १ सय ७५ हेक्टर क्षेत्रफलमा धानखेती हुँदै आएको छ । गतवर्ष ९० हजार ३ सय ७५ मेट्रिक टन धान उत्पादन भएको जिल्लामा यसवर्ष १५ देखि २० प्रतिशतले कमी आउने केन्द्रकी कृषि प्रसार अधिकृत मनिषा पौडेलले बताइन् ।
बाढीका कारण मात्र पाल्हीनन्दन र सरावल गाउँपालिकामा करिब २ हजारबढी हेक्टरको धानबाली पूर्णरुपले नष्ट भएको उनले जानकारी दिइन् । जिल्लाका अधिकांश किसान यतिबेला धान काट्न व्यस्त छन् ।
तर भित्राउने समयमा आएको बाढीले धान नष्ट भएपछि किसान चिन्तित भएका छन् ।समयमा मलखाद नपाउनु र बाढीका कारण आफ्नो ७५ प्रतिशत धान नष्ट भएको सरावल गाउँपालिका जनकपुरका किसान इन्द्रकमल चौधरीले बताए ।
काट्न तयार भएको धान बाढीले नष्ट बनाएपनि अहिलेसम्म पालिकाले कुनै पनि राहत उपलब्ध नगराएको उनले गुनासो गरे । पालिकाहरुले भने किसानलाई तत्काल कुनै राहत उपलब्ध गराउन नसकिने बताएका छन् ।
धानबालीमा राहत उपलब्ध गराउन नसके पनि हिउँदेबालीमा राहतका कार्यक्रम ल्याउने सरावल गाउँपालिकाका अध्यक्ष राधेश्याम चौधरीले बताए । 'धान काट्ने समय भएकाले किसानका लागि अब गहुँको बिउमा ५० प्रतिशत अनुदान दिएर सहयोग गछौं,'चौधरीले भने ।
जिल्लाको अधिकांश क्षेत्रफलमा धानखेती हुँदै आएको छ । धेरै किसानले धान बेचेर घर खर्च चलाउँदै आएका छन् । यसवर्ष मात्र होइन हरेक वर्ष किसानले समयमा मलखाद र बिउ पाउन सकेका छैनन् । जसका कारण हरेक वर्ष जिल्लामा धान उत्पादनमा कमि हुँदै आएको छ । जिल्लामा बहुगुणी–२, राम धान, सावा मन्सुली, राधा–४ लगायतका प्रजातिका धान लगाउने गरिन्छ ।
प्रतिक्रिया दिनुहोस !
