कोरोना लागेपछि ट्रम्प पत्नीले ह्वाइट हाउस छोड्न नमान्दा मनमुटाव
वासिङटन : अमेरिकी राष्ट्रपति डोनल्ड ट्रम्पकी पत्नी मेलानिया ट्रम्पले कोरोनाभाइरसको संक्रमण भएपछि पनि ह्वाइट हाउस छाड्ने कुनै योजना नबनाएको ह्वाइट हाउसका अधिकारीहरुले जनाएका छन् ।
ह्वाइट हाउस नछाड्ने उनको अडानले गर्दा राष्ट्रपति ट्रम्पसँग मनमुटाव भएको पनि बुझिएको छ । ट्रम्प आफैँलाई पनि कोरोनाभाइरसको संक्रमण भएको छ । आइतबार राष्ट्रपति ट्रम्प उपचारका लागि अस्पताल पुगे । तर मेलानियाले ह्वाइट हाउस नछाड्ने भएकी हुन् । ह्वाइट हाउसका अधिकारीहरुले बताए अनुसार मेलानिया कोभिड १९ को खतराप्रति सचेत नै छिन् ।
शुक्रबार बिहानै फस्र्ट लेडी मेलानियाले आफू र राष्ट्रपतिलाई कोभिड १९ को संक्रमण पुष्टि भएको जानकारी दिएकी थिइन् । तर उनले आफूलाई हल्का लक्षण मात्रै देखिएको पनि उनले जनाएकी थिइन् ।
सोमबार भने मेलानियाले आफ्नो स्वास्थ्य अवस्था ठीक भएको र नियमित रुपमा घरमै आराम गर्ने बताइन् । उनले मेडिकल स्टाफ र आफ्नो हेरचाह गर्नेहरुलाई ट्वीटरमार्फत धन्यवाद दिएकी थिइन् । साथै उनले कोभिड १९ का बिरामीहरुको सुस्वास्थ्यको कामना समेत गरेकी थिइन् ।
मेलानियाले यसवाहेक ६ महिना अघिदेखि नै लामो दूरीको यात्रा र सार्वजनिक जमघटमा जान रोकेकी थिइन् । गत महिना फस्र्ट लेडीले न्यु ह्याम्पसायर भ्रमण गरेकी थिइन् । त्यहाँ उनी जन्मजात अपांगता भएका बालबालिकाको उपचार गर्ने अस्पतालको एक कार्यक्रममा पुगेकी थिइन् । जुन महामारी सुरु भएपछि उनको पहिलो औपचारिक यात्रा थियो ।