भारतमा बलात्कार घटनाका पीडित भन्छन्ः अभियुक्तको धम्की आयो, गाउँ बस्न सकिन्न
नयाँदिल्ली : भारतको उत्तर प्रदेशस्थित हथरास गाउँमा गत महिना १९ वर्षीया किशोरीमाथि सामूहिक बलात्कारपछि हत्याको घटनासँगै स्थानीय स्तरमा राजनीतिक विभाजन र हिंसाको रुप लिएको छ ।
अभियुक्त चारजनालाई प्रहरीले पक्राउ गरी नियन्त्रणमा लिएपछि पीडित पक्षलाई धम्की आउन थालेको छ । कथित उच्च जातिका युवाहरुले सार्वजनिक रुपमै पीडित परिवारलाई धम्की दिन थालेका हुन् ।
भारतीय मिडियाका अनुसार मृतककी आमा र परिवारका सदस्यलाई कथित उच्च जातिका युवाले यदी आफूहरु जेल जानु परेमा पीडित परिवारलाई जेसुकै गर्नसक्ने भन्दै धम्की दिएका हुन् ।
तर पीडित परिवारका सदस्यहरु भने यदी उनीहरुलाई दोषी ठहर गरी जेल पठाएमा वा फाँसी दिइएमा आफूहरु गाउँ बस्न नसक्ने गुनासो गर्न थालेका छन् । गत आइतबार मात्रै घटनास्थलमा पुगेका भिम सेना प्रमुख चन्द्रशेखर आजादको अगाडि नै अभियुक्तका आफन्तले पीडितलाई धम्की दिएका थिए ।
तर उत्तर प्रदेश प्रहरीले भिम सेनाका नेता चन्द्रशेखरसहित ४ सय जनाविरुद्ध मुद्दा दायर गरेको छ । उनीहरुविरुद्ध प्रहरीले भिडभाड गरेको र प्रतिबन्धित क्षेत्रमा भेला भएर नियम उल्लंघन गरेको भन्द्र प्रहरीले मुद्दा दायर गरेको हो ।
भारतीय मिडियाका अनुसार हाथरसका पीडित परिवारले आफूहरु असुरक्षित भएको भन्दै सरकारसँग विशेष सुरक्षा मागेका छन् । हाथरस घटनालाई लिएर उत्तर प्रदेशको प्रहरी पनि विवादित बनेको छ । जब कि, बलात्कृत तथा मृतक युवतीको शवलाई प्रहरीले परिवारको रोहवरविना नै जलाइदिएको थियो ।
सेप्टेम्बर १४ मा हाथरसकी १९ वर्षीया किशोरीमाथि सामूहिक बलात्कार गरी उनको जिब्रो काटेर फालिदिएको भन्दै चार जनाविरुद्ध मुद्दा दायर भएको छ । बलात्कृत किशोरीको दिल्लीस्थित अस्पतालमा उपचारको क्रममा मृत्यु भएको थियो ।
तर अभियुक्तका परिवारले त्यहाँ बलात्कार नभएको जिकिर गर्दैआएको छ । सोही अनुरुप यदी मुद्दा चलेर जेल जानुपर्ने अवस्था आएमा युवतीका परिवार र आफन्तको ज्यान मार्नेसम्मको धम्की दिएका छन् ।