बैतडी : बैतडीका ९ वटा स्थानीय तहमा अस्थायी कोभिड अस्पताल बन्ने भएका छन् । कोरोना भाइरसको बढ्दो जोखिमलाई ध्यानमा राखेर अस्थायी कोभिड अस्पताल निर्माण हुने स्वास्थ्य कार्यालयका प्रमुख योगेशप्रसाद भट्टले जानकारी दिए ।
संघीय सरकारले अस्पताल नभएका स्थानीय तहहरुमा अस्थायी कोभिड अस्पताल निर्माणका लागि बजेट पठाइसकेको उनले बताए । जिल्लाका ९ स्थानीय तहमा ५ बेडका अस्थायी कोभिड अस्पताल निर्माण हुने भट्टले जानकारी दिए ।
स्थानीय तहमा अस्थायी कोभिड अस्पताल निर्माणका लागि १० लाखका दरले बजेट पठाइएको छ । बैतडीमा दशरथचन्द नगरपालिका बाहेकका सबै स्थानीय तहमा ५ बेडका अस्थायी कोभिड अस्पताल निर्माण हुने स्वास्थ्य कार्यालयले जनाएको छ ।
जिल्लाको दोगडाकेदार गाउँपालिका, पुर्चौंडी नगरपालिका र सिगास गाउँपालिकाले अस्पताल सञ्चालनका लागि आवश्यक जनशक्तिको समेत माग गरिसकेका छन् । ती अस्पतालमा एकजना चिकित्सक, २ जना स्टाफ नर्स र एकजना कार्यालयको सहयोगीको ३ महिनाका लागि दरबन्दी रहेको स्वास्थ्य कार्यालयका प्रमुख भट्टले जानकारी दिए ।
१० लाख बजेट मध्ये स्थानीय तहहरुले ५ लाख बेड लगायतका सामग्री खरिदमा खर्च गर्नुपर्नेछ भने ५० हजार बराबरको औषधि खरीद गर्नुपर्नेछ । यस्तै ४ लाख ५० हजार जनशक्ति जनशक्ति परिचालनमा खर्च गर्नुपर्नेछ । यी अस्पताल तीन महिनाका लागि सञ्चालन गर्नुपर्ने भएकाले स्थानीय तहमै भएका स्वास्थ्य संस्थामा यी अस्पताल सञ्चालन गर्नुपर्ने बताइएको छ ।
जिल्लाको पाटन नगरपालिकाले पनि केही दिनभित्रै जनशक्ति माग गर्ने तयारी गरेको नगरपालिकाका स्वास्थ्य शाखा प्रमुख मदनसिंह महराले जानकारी दिए । उनले भने, 'प्राथमिक स्वास्थ्य केन्द्रमै ५ बेडको अस्थायी कोभिड अस्पताल निर्माणका लागि कार्यपालिकाले निर्णय गरिसकेको छ । केही दिनभित्रै जनशक्ति माग गरेर अस्पताल सञ्चालन गरिनेछ ।'
यस्तै सिगास गाउँपालिकाले पनि अस्थायी कोभिड अस्पताल सञ्चालनको तयारी गरेको स्वास्थ्य शाखा प्रमुख घनश्याम बोहराले जानकारी दिए । उनले अस्थायी कोभिड अस्पताल सञ्चालनका लागि आवश्यक जनशक्तिका लागि आवेदन आह्वान गरिसकेको बताए।
प्रतिक्रिया दिनुहोस !
