काठमाडौं : कोरोना कहरले कलाकारको मात्र होइन सबैको जनजीवन अस्तव्यस्त छ । तर पनि यो परिस्थिति सहज बनाउन सबैले आआफ्नो स्थानबाट प्रयास गरिनै रहेका छन् । अन्य विधाभन्दा पनि सबैभन्दा मारमा परेको कलाकारिता क्षेलाई नै आफ्नो कर्मथलो बनाएकाहरूका लागि त अहिलेको परिस्थिति झनै विकराल छ ।
यही मेसोमा लामो समयदेखि कलाकारितालाई आफ्नो जीवनशैली बनाएका रमेश श्रेष्ठले नयाँ कामको थालनी गरेका छन् । हुनत उनी पाक कलाका पारखी पनि हुन् । आफ्नो त्यही कलालाई विकल्पको रूपमा प्रयोग गर्दै उनले अप्ठ्यारो परिस्थितिमा सेवा पुर्याउने प्रयास थालेका हुन् ।
लामो समयदेखि सामाखुसीमा संगीत र नृत्यसम्बन्धी प्रशिक्षण दिँदै आएका निर्भाना कला केन्द्रका अध्यक्ष रमेशले आफ्ना दुई सहकर्मी ट्राभल एन्ड टुर्स तथा वैदेशिक रोजगार व्यवसायी यमबहादुर बुढाथोकी र आईटी इन्जिनियर सूर्य श्रेष्ठसँगको सहकार्यमा यथास्थानसम्म विभिन्न परिकार पुर्याएर सेवा दिइरहेका छन् ।
गोंगबुमा निकोलस हस्पिटालिटी सर्भिसेज प्रालिमार्पmत यो सेवा सुरु गरेको उनले जानकारी दिए । ‘जस्तो परिस्थिति आउँछ त्यसैलाई उपयोग गर्दै स्थिति सहज बनाउने प्रयास गरेका हौं’, रमेशले भने । चार वर्षदेखि होटल तालिम प्रदान गर्दै आएको निकोलस हस्पिटालिटी सर्भिसेज प्रालिमार्फत यो सेवा सुरु गरिएको हो । ‘एक पन्थ दो काज’ भनेझैं अहिले निकोलसले वेटर, बार टेन्डर, बारिस्टा, कुक, हेल्पर, लन्ड्री, क्लिनर, हाउस किपिङ, फ्रन्टडेक्स, होटललगायतका विभन्नि प्रशिक्षण दिन्छ ।
निकोलसले टेक वे र होम डेलिभरीको साथमा स्वादिष्ट मौलिक परिकार रेस्टुरेन्टमै पस्कँदै आएको छ । ७० भन्दा बढी म्युजिक भिडियो निर्माण र निर्देशन गरेका श्रेष्ठ जुनसुकै काम गरे पनि त्यसमा लगनशील भएर लागे सफल भइने धारणा राख्छन् । दुई दर्जनभन्दा बढी म्युजिक भिडियो र ५० भन्दा बढी कमर्सियलमा मोडलिङ गरेका रमेश पाककला र अभिनय कला एकसाथ अघि बढाउने बताउँछन् ।
प्रतिक्रिया दिनुहोस !
