कश्मीरी नेत्री मेहबुबालाई एक वर्ष लामो हिरासतपछि मध्यरातमा रिहा गरियो
नयाँदिल्ली : जम्मु–कश्मीरकी पूर्व मुख्यमन्त्री तथा पिपल्स डेमोक्रेसी पार्टी (पीडीपी)की अध्यक्ष मेहबुबा मुफ्ती हिरासतबाट रिहा भएकी छन् ।
जम्मु–कश्मीर सरकारले अन्ततः मंगलबार राति उनलाई एक वर्ष भन्दा लामो हिरासतबाट रिहा गरेको हो । मेहबुबा रातको पौने १० बजे रिहा भएको स्थानीय मिडियाले जनाएका छन् । जम्मु–कश्मीर सरकारका आधिकारिक प्रवक्ता रोहित कन्सलले केही अघि ट्वीट गर्दै मेहबुबालाई रिहा हुँदै गरेको जानकारी दिएका थिए ।
भारतको केन्द्र सरकारले गत वर्ष अगस्ट ५ मा संविधानको धारा ३७० खारेज गर्दै जम्मु–कश्मीरको स्वायत्तता खोसेपछि नै मेहबुबा सहित अन्य थुप्रै नेताहरुलाई पक्राउ गरिएको थियो । ओमर अब्दुल्लाह, फारुक अब्दुल्लाह र अन्य केही नेताहरु भने २०२० को सुरुतिरै रिहा भएका थिए । मेहबुबालाई भने बारम्बार म्याद थप्दै हिरासतमा राखिएको थियो ।
पछिल्लो पटक जुलाइमा उनको हिरासत अवधि थप तीन महिनाका लागि लम्ब्याइएको थियो । २०१८ जुनसम्म मेहबुबा मुफ्तीको पार्टी पीडीपी भाजपासँग गठबन्धन सहित जम्मु–कश्मीरमा शक्तिमा थियो । मेहबुबा रिहा भएपछि अब शुक्रबार कार्यकर्ताहरुलाई सम्बोधन गर्ने बताइएको छ । गत वर्षको अगस्ट ५ देखि नै जम्मु–कश्मीरमा स्थिरता र शान्तिपूर्ण राजनीतिक अवस्था देखिएको छैन ।