भारतका विभिन्न स्थानमा भारी वर्षा र बाढी, ३० को मृत्यु
नयाँदिल्ली : दक्षिण भारतका विभिन्न क्षेत्रमा मुसलधारे वर्षाका कारण जनजीवन अस्तव्यस्त बनेको छ । विभिन्न स्थानमा गरी कम्तिमा ३० जनाको मृत्यु भएको बताइएको छ ।
तेलंगानामा पछिल्लो दुई दिनदेखि भारी वर्षाका कारण बाढी आउँदा जनजीवन कष्टकर बनेको छ । राजधानी हैदराबादका कतिपय स्थान जलमग्न बन्दा थुप्रै मानिस विस्थापित बनेका छन् । आन्ध्र प्रदेश, केरल, ओडिसा कर्नाटक सहित महाराष्ट्रका विभिन्न ठाउँमा पनि भीषण वर्षासँगै बाढीले जनजीवन अस्तव्यस्त बनाएको छ ।
आन्ध्र प्रदेशका कम्तिमा ६ जिल्लामा वर्षाको असर देखिएको छ । भारी वर्षाका कारण आएको बाढीबाट दुईदेखि तीन सय गाउँ प्रभावित बनेका छन् । बीबीसी हिन्दीका अनुसार भारी वर्षाका कारण आन्ध्र प्रदेशका विभिन्न स्थानमा सडक भत्किनुका साथै बिजुली समेत कटौती भएको छ । यस्तै हैदराबादमा बाढीका कारण दुई दिनको अवधिमा करिब एक दर्जन मानिसको ज्यान गएको छ ।
यस्तै बंगालको खाडीमा उत्पन्न कम हावाको दबाबका कारण ओडिसाका धेरैजसो भागमा वर्षा भएको बताइएको छ । यस्तै भारतीय मौसम विभागले १४ अक्टोबरमा महाराष्ट्रमा अझै दुईदेखि तीन दिन भारी वर्षा हुने चेतावनी दिएको बीबीसी हिन्दीमा उल्लेख छ । साथै कतपिय स्थानमा अलर्ट गरिएको छ ।
प्रधानमन्त्री नरेन्द्र मोदीले ट्वीट गर्दै आन्ध्र प्रदेश र तेलंगनामा तीव्र वर्षाका कारण उत्पन्न भएको अवस्थाप्रति दुबै राज्यका मुख्यमन्त्रीसँग कुराकानी गरेर मद्दत गर्ने आश्वासन दिएका छन् । केन्द्रीय गृहमन्त्री अमित शाहले पनि गृह मन्त्रालय तेलंगना र आन्ध्र प्रदेशमा भइरहेको भारी वर्षा र बाढीबाट उत्पन्न अवस्था आफूले देखेको र सहायता गर्ने प्रतिवद्धता पनि व्यक्त गरे ।