दोलखामा करदाता सेवा कार्यालय, साना व्यवसायी लाभान्वित

दोलखा : सदरमुकाम चरिकोटमै करदाता सेवा कार्यालयले राजश्व संकलनको काम सुरु गरेको छ । यसअघि राजश्वभन्दा यातायात र बसाइ खर्च बढी तिरेर धुलिखेलबाट लिनुपर्ने सबै सेवा शुक्रबारदेखि सदरमुकाम चरिकोटमै सुरु भएको हो ।

आन्तरिक राजश्व कार्यालय धुलिखेलले शुक्रबारदेखि सदरमुकाम चरिकोटबाट करदाता सेवा सुरु गरेसँगै जिल्लाका साना व्यवसायीहरु लाभान्वित हुन थालेका छन् । प्रमुख जिल्ला अधिकारी रमेशप्रसाद शिवाकोटीले करदाता सेवा कार्यालयलाई नै प्यान नम्बर प्रदान गरी सेवा सुरु गरेका थिए । प्रजिअ शिवाकोटीले करदातालाई रहरले कर तिर्ने वातावरण सिर्जना गर्न कर्मचारीहरुलाई आग्रह गरे ।

जिल्लाबाट सेवा सुरु भएसँगै साना व्यवसायीलाई धेरै सहज हुने र करदाता संख्या पनि थपिने आनुमान गरिएको करदाता सेवा कार्यालय दोलखाका प्रमुख रामकु्मार श्रेष्ठले बताए । कार्यालय सञ्चालनमा आएसँगै व्यक्तिगत प्यान, व्यवसायिक प्यान र भ्याट दर्ता तथा खारेज, करचुक्ता प्रमाणपत्र प्रदान, कर विवरण, आय विवरण, अन्तःशुल्क विवरण बुझाउने लगायतका सेवा लिन जिल्ला बाहिर जानु नपर्ने प्रमुख श्रेष्ठको भनाइ छ ।

चालु आर्थिक वर्षको असोज २८ गतेसम्म दोलखा जिल्लामा १० हजार ३ सय ९ वटा प्यान तथा भ्याट दर्तामा रहेको कार्यालयले जनाएको छ । आर्थिक वर्ष २०७६/०७७ मा दोलखाबाट प्यान, भ्याट र अन्तशुल्कबापत १५ करोड २७ लाख ७४ हजार ३ सय २ राजश्व संकलन भएको कार्यालय प्रमुख श्रेष्ठले जानकारी दिए ।

जिल्लामा व्यक्तिगत प्यान २२९४, व्यवसायिक प्यान ६८०८, भ्याट १०१८, सरकारी कार्यालयको प्यान ४४, शैक्षिक प्यान १६, स्वास्थ्य प्यान ८, अन्तशुल्क ५१ वटा गरी कूल १० हजार ३ सय ९ करदाता रहेको कार्यालयको तथ्याङ्क छ ।