भारतको उत्तर प्रदेशमा प्रहरी अधिकृत बसेकै बैठकमा गोली चल्यो, एकको मृत्यु
असोज ३०, २०७७ शुक्रबार १६:२५:०
नयाँदिल्ली : भारतको उत्तर प्रदेशस्थित बलिया जिल्लाको दुर्जनपुर गाउँमा राशन कोटा छनोटका लागि बसेको स्थानीयको बैठकमा गोली चल्दा एक जनाको मृत्यु भएको छ ।
बैठकमा विवाद भएपछि बैठकमै उपस्थित एक व्यक्तिले गोली प्रहार गरेका थिए । उनको गोली लागी एकजनाको मृत्यु भयो भने अरु ५ जना घाइते छन् । उनीहरुको अवस्था गम्भीर रहेको बताइएको छ ।
स्थानीय मिडियाका अनुसार उक्त बैठकमा प्रहरी अधिकृत लगायत अन्य स्थानीय सरकारी अधिकारीहरु पनि थिए । प्रहरीका अनुसार गोली प्रहार गर्ने व्यक्ति भागेकाले खोजी कार्य भइरहेको छ । तर राज्य सरकारले त्यहाँ उपस्थित स्थानीय प्रहरीहरुलाई लापरवाही गरेको भन्दै निलम्बन गरेको छ ।
कोटाबारे विवाद भएपछि दुई समुहमा विभाजित भइ स्थानीयहरुबीच झगडा भएको थियो । बैठकमा गोली चलेपछि भने कोटा प्रकृया नै स्थगित भएको थियो । उत्तर प्रदेशकै हाथरसमा गत महिना सामूहिक बलात्कारपछि हत्या प्रकरणमा प्रहरीले लापरवाही गरेको भन्दै आलोचित बनेपछि थुप्रै प्रहरी अधिकारीहरु निलम्बनमा परेका थिए ।
प्रतिक्रिया दिनुहोस !
