अफगानिस्तानमा प्रहरी मुख्यालय लक्षित गर्दै बम विस्फोटः १२ मारिए, सय बढी घाइते

काबुल : अफगानिस्तानको पश्चिमी प्रान्त घोरस्थित प्रहरी हेड क्वार्टरलाई लक्षित गर्दै गरिएको कार बम विस्फोटमा १२ आम नागरिकको मृत्यु हुनुका साथै एक सय भन्दा धेरै घाइते छन् ।

सरकारी अधिकारीका अनुसार घोरको राजधानी फेरोज कोमा रहेको प्रहरी मुख्यालयलाई लक्षित गर्दै आक्रमण भएको हो । स्थानीय मिडियाका अनुसार यो प्रान्त तुलनात्मक रुपमा कम हिंसात्मक गतिविधि हुने क्षेत्र हो ।

स्थानीय समय अनुसार आइतबार बिहान ११ बजे आक्रमण भएको थियो । ‘आतंककारीहरुले कार बम विस्फोट गराए । जहाँ १२ नागरिक मारिए र एक सय भन्दा धेरै घाइते भए,’ गृह मन्त्रालयले जनाएको छ ।

एएफपीका अनुसार घटनामा सुरक्षाकर्मीहरु पनि पीडित भएका छन् । यद्यपि विस्फोटको जिम्मा अहिलेसम्म कुनै पनि समूहले लिएको छैन । प्रान्त सरकारले त्यहाँ शक्तिशाली विस्फोट भएको जनाएको छ । साथै घाइतेहरुलाई नजिकका अस्पतालमा उपचारका लागि लगिएको छ ।

अफगानिस्तानमा २० वर्षदेखि सक्रिय सशस्त्र विद्रोही तालिबान समूहसँग वार्ता प्रक्रिया अझै सम्पन्न भइसकेको छैन । अफगान सरकार, विद्रोही तालिबान समूह र अमेरिकाबीच चरणबद्ध वार्ता भए पनि प्रक्रिया सम्पन्न भइसकेको छैन । तीन पक्षबाटै सम्झौताहरु पूर्ण रुपमा पालना भएका छैनन् ।