नुवाकोट : फिल्म निर्देशक एभरेष्ट सूर्य बोहराले आधुनिक प्रविधिसहित नयाँ तरिकाले चलचित्र ‘श्री’ तयार पारेका छन् । अनुभवी निर्देशक बोहराले जम्मा ७२ घण्टा निरन्तर क्यामेरा ‘अन’ गर्नुका साथै एउटै लोकेशनबाट उक्त चलचित्र छायांकन गरेका हुन् ।
नेपाली चलचित्र इतिहासमै सबैभन्दा कम समय अर्थात् जम्मा ७२ घण्टा मात्र क्यामेराले खिचेर सामाजिक विषयवस्तुमा आधारित चलचित्र ‘श्री’ तयार भएको बताइएको छ । कोरोना भाइरसको महामारीका कारण ७ महिनादेखि चलचित्र निर्माण तथा प्रदर्शन ठप्प भएका बेला निर्देशक बोहराले यस पटक चलचित्र निर्माणमा नयाँ कौशल प्रयोग गरेका हुन् ।
चलचित्रको छायांकन सकेर सम्पादन तथा स्वरांकन कार्यसमेत शनिबार सकिएको छ । निर्देशक बोहराले फसर््टलुक पोस्टर समेत सार्वजनिक गरे । चलचित्रमा सन्दीप क्षेत्री, वर्षा शिवाकोटी, बुद्धि तामाङ, राजाराम पौडेल, बसुन्धरा भुसाल, रवीन्द्र झा, भोला सापकोटा, कमलजंग बोहरा (काजी), मोहनकृष्ण श्रेष्ठ, सविता गुरुङ, नवीन श्रेष्ठ तथा बालकलाकार न्यासिका कार्की देखिनेछन् ।
सन्दीप र वर्षाको मुख्य भूमिका फिल्ममा देखिनेछ । जहाँ सन्दीप अघिल्ला फिल्म भन्दा भिन्न भूमिकामा हुने बताइएको छ । एभरेष्ट सूर्य बोहरा फिल्म्सको ब्यानर, महारानी इन्टरटेन्मेन्ट युके र ओएसआर डिजिटलको सहकार्यमा निर्माण भएको ‘श्री’को निर्माता श्री पराजुली र सविता गुरुङ हुन् भने यम बराल, सूर्य सिम्खडा (साइराम), बाल शर्मा (टाइगर) र सिन्धु पौडेल गौतम सहनिर्माता हुन् । चलचित्रमा भरपुर मनोरञ्जन साथै उपयोगी सन्देश समेत प्रस्तुत छ ।
प्रतिक्रिया दिनुहोस !
