कोरोना अपडेट: संक्रमित संख्या ४ करोड नाघ्यो, खोप आउनुअघि नै २० लाखको मृत्यु हुनसक्ने
कात्तिक ३, २०७७ सोमबार १५:३०:०
काठमाडौँ : विश्वभर कोरोनाभाइरस संक्रमितको संख्या सोमबारसम्म ४ करोड नाघिसकेको छ । यो संख्या सोमबारसम्म ४ करोड ३ लाख २५ हजार भन्दा बढी छ ।
पृथ्वीको उत्तरी गोलार्धमा जाडो मौसम बढेपछि यो संक्रमण झन् फैलनसक्ने विज्ञहरुले बताएका छन् । रोयटर्सका अनुसार विश्वभर संक्रमितको संख्या ३ करोडबाट ४ करोडसम्म पुग्न जम्मा ३२ दिन लाग्यो । अर्थात् एक महिनामै १ करोड नयाँ संक्रमित थपिएका हुन् ।
जब कि यसअघि २ करोड संक्रमित संख्याबाट ३ करोड पुग्न ३८ दिन लागेको थियो । र १ करोड संक्रमित संख्याबाट २ करोड पुग्न ४४ दिन लागेको थियो । तर गत वर्षको डिसेम्बरमा चीनको वुहानमा पहिलो संक्रमित देखिएपछिको तीन महिनापछि मात्रै विश्वभर १ करोड संक्रमित भएका थिए ।
विज्ञहरुले पछिल्लो तथ्यांक हेर्दा महामारी झन् तीव्र रुपमा बढ्ने चेतावनी दिएका छन् । पछिल्लो साताको एकै दिन कोरोना संक्रमितको संख्या ४ लाख पुगेको थियो । यति धेरै संक्रमित एकै दिन पुष्टि भएको यो पहिलो पटक हो ।
अन्य दिनमा प्रायजसो एक दिनमा ३ लाख भन्दा धेरै हुने गरेका छन् । कोरोना संक्रमित नियन्त्रणको सवालमा अमेरिका, भारत र ब्राजिल विश्वभर सबैभन्दा खराब अवस्था भएका देश हुन् । उत्तर, केन्द्र र दक्षिण अमेरिकामा मात्रै विश्वभरका कोभिड १९ का संक्रमित संख्यामध्ये ४७ दशमलब २७ प्रतिशत बिरामी छन् । जुन विश्वभर संक्रमितहरुको पूरा संख्याको झण्डै आधा जनसंख्या हो ।
अमेरिकामा १० हजार कोभिड परीक्षणमा २ सय ४७ जति संक्रमित भेटिने गरेको तथ्यांक छ । भारत र ब्राजिलमा भने यो संख्या १० हजारमा ५५ संक्रमित र १० हजारमा २ सय ४८ संक्रमित भेटिने गरेको तथ्यांक सार्वजनिक भएको छ ।
जोन्स हकिन्स विश्वविद्यालयको पछिल्लो तथ्यांक अनुसार यूरोपमा नयाँ संक्रमितको संख्या हरेक दिन १ लाख ५० हजारले वृद्धि भएको छ । इटाली, नेदरल्याण्ड, जर्मनी, अस्ट्रिया, पोल्याण्ड, युक्रेन, साइप्रस र चेक रिपब्लिकमा हरेक दिन संक्रमित संख्या बढ्दो क्रममा छ ।
यूरोपमा जम्मा विश्वको संक्रमित संख्यामध्ये १७ प्रतिशत र मृतक संख्यामध्ये २२ प्रतिशत देखिने गरेको छ । यूके, फ्रान्स लगायत यूरोपका कतिपय देशले अझै पनि कोरोना रोकथामका लागि कडा नीति अपनाइरहेका छन् ।
भारतमा भने कोरोना संक्रमितको संख्या ७५ लाख पुगिसकेको छ । जहाँ डेढ महिनाको अवधिमा ८ लाख भन्दा थेरै सक्रिय संकर्मित अहिले छन् । यस्तै इरान लगायत मध्यपूर्वका देशहरु पनि कोरोना महामारीको गहिरो चपेटामा परेका छन् । ती देशमा पछिल्लो समय संक्रमण तीव्र रुपमा बढ्न थालेको छ । इरानको राजधानी तेहरानमा अक्टोबरको तेस्रो हप्ता मृत्यु हुनेको संख्या ३० हजार पुगेको थियो ।
यस्तै महामारी सुरु भएदेखि हालसम्म कोभिड १९ का कारण ११ लाख मानिसको मृत्यु भइसकेको छ । विश्वभर २ दशमलब ८ प्रतिशत मृत्युदर रहेको तथ्यांक छ । विश्व स्वास्थ्य संगठन (डब्लूएचओ) का अनुसार विश्वभरी कोभिड १९ को खोप वितरण गरिनुभन्दा पहिले नै २० लाख मानिसको मृत्यु भइसक्ने आंकलन गरेको छ ।
प्रतिक्रिया दिनुहोस !
