गोरखा : कोरोना संक्रमण फैलिरहेका बेला सेवाग्राहीको भीड बढेको भन्दै प्रमुख जिल्ला अधिकारी तीर्थराज भट्टराईले कार्यालयबाट हुने अति आवश्यकबाहेक सबै सेवा बन्द गरेका छन् ।सार्वजनिक सूचना जारी गरी प्रजिअ भट्टराईले मंगलबार, बुधबार र बिहीबार कार्यालयको नियमित कामकाज बन्द गरेका हुन् । 'हामीले सूचनामै भनेका छौँ कि, सेवा लिन आउने सेवाग्राहीको चापको कारण संक्रमणको जोखिम बढ्ने भएपछि अत्यावश्यक सेवाबाहेकका नियमित सेवाहरु आउँदो कात्तिक ६ गतेसम्म बन्द गरिएको हो,' सहायक प्रमुख जिल्ला अधिकारी देवी पाण्डे खत्रीले भनिन्, 'कार्यालयमा ज्यादै भीडभाड भयो । भीड व्यवस्थापन गर्न प्रहरी नै परिचालन गर्नुपर्ने अवस्था आयो । त्यसैले नियमित सेवा बन्द गर्नुपरेको हो ।'
जिल्लाका अरु कार्यालयका कामकाज भने निर्वाध रुपमा सञ्चालन भइरहेका छन् । 'अरु कार्यालयले पनि जोखिम बढेको महशुस गरे भने बन्द गर्न सक्ने अधिकार उहाँहरुलाई छ,' सप्रजिअ खत्रीले भनिन् ।
जिल्लाको अभिभावकीय दायित्वसमेत भएकाले जिल्ला प्रशासन कार्यालय आफूले मात्र नियमित सेवा बन्द गर्नु उचित नहुने नागरिक समाजले तर्क गरेका छन् । 'सूचनामा जुन कोभिड १९ जोखिमको कारण देखाइएको छ, अहिलेकै अवस्थामा त्यत्ति उचित देख्दिन, ' नेपाल बार एशोसिएशनका पूर्व अध्यक्ष तथा मानवअधिकारकर्मी स्थानेश्वर दुवाडीले भने, 'किनभने पहिले पनि प्रशासन कार्यालय बन्द भएको थियो ।
त्यो बेला कार्यालयका कर्मचारीलाई समेत संक्रमण भएको थियो । अहिले त्यो अवस्था पनि छैन । पहिले एकै दिनमा २०, २२ जनामा संक्रमित बढेका थिए। अहिले त्यो अवस्था पनि छैन । अनि अरु कार्यालयले काम गरिरहेका बेला प्रशासन कार्यालयले आफ्नो काम मात्र रोक्नु उचित होइन।'
कार्यालयको नियमित सेवा बन्द गरी प्रजिअ भट्टराई, सप्रजिअ खत्रीसहितको टोली भूकम्पको केन्द्र विन्दू बारपाक पुगेका छन् । बर्खा महिनामा पहिरोमा घर क्षति भएकालाई राहत दिनका लागि बारपाक पुगेको सप्रजिअ खत्रीले बताइन् ।
प्रतिक्रिया दिनुहोस !
