परासी : पश्चिम नवलपरासीका जनप्रतिनिधिले चाडपर्वबापतको दसैं खर्च लिएका छन् । लुम्बिनी प्रदेश सरकारले मुख्यमन्त्री, सभामुख, प्रदेशसभा सदस्य र स्थानीय तहका जनप्रनिनिधिका लागि चाडपर्व खर्चको प्रबन्ध नगरेको जनाइ रहेका बेला जिल्लाका जनप्रनिधिहरुले भने धमाधम दसैं खर्च बुझेका हुन् ।
जनप्रतिनिधिहरुले दसैं खर्च लिएको बारे आलोचना बढेको भन्दै मुख्यमन्त्रीका प्रेस सल्लाहकार शेरबहादुर केसीले विज्ञप्ति निकालेर चाडपर्व खर्च प्रबन्ध नगरेको प्रष्टिकरण दिएका छन् ।
विज्ञप्तिमा अझ चाडपर्व खर्च (दसैं खर्च) कसैले पनि नलिएको दाबी समेत गरिएको छ । रकम उपलब्ध गराएका केही पालिकाका प्रमुख प्रशासकीय अधिकृतले भने मुख्यमन्त्रीका प्रेस सल्लाहकार केसीले निकालेको विज्ञप्ति कानुनमा बाँझिने गरी सस्तो लोकप्रियताका लागि निकालिएको र कानुनअनुसार रकम दिइएको बताएका छन् ।
प्रदेश सरकारको स्थानीय तहका पदाधिकारी तथा सदस्यहरुले पाउने सेवा सुविधासम्बन्धी कानुनमा संशोधन र एकीकरण गर्न बनेको विधेयक २०७६ मा जनप्रतिनिधिका लागि अन्य सुविधासहित चाडपर्व खर्च पाउने उल्लेख छ ।
जिल्लामा ३ नगरपालिका र ४ गाउँपालिका गरी ७ स्थानीय तह छन् । सबैपालिकाहरुले साउनदेखि असोजसम्मको चाडपर्वसहित अन्य सबै सुविधा उपलब्ध गराएका छन् । ७ स्थानीय तहहरुबाट चाडपर्वका लागि मात्र करिब ४० लाख रुपैयाँ जनप्रनिधिलाई उपलब्ध गराइएको छ ।
५ स्थानीय तहहरुले जनप्रतिनिधिलाई रकम दिइसकेका छन् । सरावल र पाल्हीनन्दन गाउँपालिकाले साउनदेखि असोजसम्मको सुविधा र चाडपर्व खर्च दसैंअघि नै उपलब्ध गराउनका लागि चेक तयार भइसकेको जनाएका छन् । रामग्राम नगरपालिकाका लेखापाल सञ्जय शर्माले प्रदेशअनुसार चाडपर्वबापत ८ लाख ४० हजार उपलब्ध गराएको जनाए । बर्दघाट नगरपालिकाका लेखाअधिकृत विष्णु पुरीले चाडपर्व खर्चलाई परिमार्जन गर्ने भन्ने बारेको परिपत्र नआएकाले कानुनअनुसार जनप्रतिनिधिहरुलाई खर्च उपलब्ध गराएको जनाए । उक्त नगरपालिकाले चाडपर्व खर्चबापत ७ लाख ४६ हजार उपलब्ध गराएको छ ।
प्रतापपुर गाउँपालिकाका प्रमुख प्रशासकीय अधिकृत भेषराज खनालले कुनै पनि जनप्रतिनिधिहरुले लिदैनौं नभनेकाले प्रदेश सरकारले बनाएको कानुनअनुसार नै जनप्रतिनिधिको खातामा रकम पठाएको बताए ।
प्रदेश सरकारले बनाएको कानुनमा नगरपालिका र गाउँपालिका प्रमुख/उपप्रमुखले अन्य सुविधाबाहेक वार्षिक १५ हजारका दरले चाडपर्व खर्च पाउँछन् । त्यसैगरी दुवै स्थानीय तहका वडाअध्यक्षहरुले १२ हजार र कार्यपालिका सदस्यले १० हजारका दरले चाडपर्व खर्च पाउने उल्लेख छ । चाडपर्व खर्चमा नगरपालिकाका सदस्यले ८ हजार र गाउँपालिका सदस्यले ७ हजार पाउने उल्लेख छ ।
सबै सुविधा फिर्ता
यसैबीच सुनवल नगरपालिकाका प्रमुख भीमबहादुर थापाले आफूले पाउने सबै सुविधाबापतको रकम नगरपालिकाको सञ्चित कोषमा जम्मा गरेका छन् । साउनदेखि असोजसम्मको सेवा सुविधा र चाडपर्वबापतको कुल १ लाख ६६ हजार रुपैयाँ मेयर थापाले सञ्चित कोषमा जम्मा गरेको लेखापाल लेखनाथ गौतमले बताए ।
थापाले निर्वाचित भएलगत्तै आफूले पाउने सेवा सुविधाबापतको रकम सामाजिक कार्यसँगै नगरपालिकाको विकासमा खर्चिने जनाएका थिए । उनले अहिलेसम्म पाएको सेवा सुविधाबापतको रकम अशक्त तथा असायको उपचार, जेष्ठ नागरिक र स्वास्थ्य क्षेत्रमा खर्चेका छन् । बाँकी रकम सञ्चित कोषमा जम्मा गर्दै आएका छन् ।
प्रतिक्रिया दिनुहोस !
