भारतीय प्रधानमन्त्रीको आग्रह: लापरवाही नगर्नू, चाडवाडमा कोरोना फैलनसक्छ
नयाँदिल्ली : भारतीय प्रधानमन्त्री नरेन्द्र मोदीले कोरोनाभाइरसको संक्रमण अझै फैलिरहेको बेला लापरवाही नगर्न आग्रह गरेका छन् ।
देशबासीका नाममा मंगलबार साँझ सम्बोधन गर्दै उनले यस्तो बताएका हुन् । वहुसंख्यक भारतीय हिन्दू समुदायमा लोकप्रिय नवरात्रि पर्वको अवसरमा उनले चाडवाडमा सानो लापरवाहीले पनि ठूलो क्षति हुनसक्ने भन्दै महामारीबाट सावधान रहन आग्रह गरे ।
कोभिड १९ को महामारी फैलिएदेखि नै भारतीय प्रधानमन्त्री मोदीको देशबासीका नाममा यो सातौँ सम्बोधन हो । पछिल्लो समय आम नागरिकले महामारीप्रति सावधानी नअपनाएको भन्दै उनले यस्तो गल्तीले ठूलो क्षति हुनसक्ने भन्दै सचेत रहन सबैलाई आग्रह गरे ।
यस्तै सरकारले कोभिडको खोप उपलब्ध गराउने काममा पूरा प्रयास गर्ने पनि मोदीले प्रतिवद्धता व्यक्त गरे । भारतमा कोभिड १९ को महामारीको उपचार दर नाजुक देखिएको छ । यद्यपि मृत्युदर भने कम नै छ ।
पछिल्लो तथ्यांक अनुसार भारतमा हरेक १० लाख जनसंख्यामा ५ हजार ५ सय कोरोना संक्रमित देखिने गरेका छन् । जब कि, यस्तो तथ्यांक अमेरिका र ब्राजिलमा हरेक १० लाखमध्ये २५ हजार संक्रमित देखिने गरेका छन् ।
साथै भारतमा हरेक १० लाख परीक्षणमा ८३ जनाको मृत्यु हुने गरेको छ । जबकि अमेरिका, ब्राजिल, स्पेन, यूके जस्ता देशमा यो मृत्युदर ६ सय पुगेको बताइन्छ । यस्तै तथ्यांकका आधारमा प्रधानमन्त्री मोदीले आफूहरुले कोभिड महामारीविरुद्धको लडाइँमा सफल भएको बताए ।
देशभर चिकित्सक, नर्स लगायत स्वास्थ्यकर्मीहरुले कोरोनाविरुद्धको लडाइँमा गहन रुपमा काम गरेको भन्दै मोदीले उनीहरुको प्रशंसा पनि गरे । 'तर यो लापरवाही गर्ने बेला हैन । चाडवाडको मौसममा, बजारहरु खुलेका छन् । तर लकडाउनको अन्त्य भए पनि कोभिड १९ सकिएको छैन,' प्रधानमन्त्री मोदीले भनेका छन् । यस्तै हरेक भारतीय नागरिकले गएको ७-८ महिनादेखि गरेको प्रयासका कारण भारत अहिले स्थिर अवस्थामा रहेको भन्दै यसलाई थप फैलन नदिन आग्रह गरेका छन् ।