बैतडी : कोरोना भाइरसका कारणले यो वर्ष बैतडीमा दसैंको रौनक नभएको स्थानीयले बताएका छन् । कोरोना भाइरसको जोखिमले जिल्ला बाहिर रहेकाहरु पनि जिल्ला भित्रिन नपाउँदा दसैंको खासै रौनक नभएको पण्डित देवदत्त भट्टले बताए ।
उनले भने ‘अरु बर्ष शक्तिपीठहरुमा पूजाआजाका लागि जिल्ला बाहिर रहेकाहरु पनि जिल्लामा भित्रिन्थे । बेग्लै रौनक हुन्थ्यो तर यो वर्ष कोरोनाका कारण दसैंमा समेत गाउँघर सुनसान बनेका छन् ।'
दसैंको समयमा विभिन्न शक्तिपीठमा बलिसहित पूजाआजा र जात्रा पनि हुने गरेको भएपनि यो वर्ष कोरोना भाईरसका कारण जात्राहरु स्थगित भएका छन् । दसैंको समयमा बसाईसराई गरेर गएकाहरु पनि गाउँ फर्किँदा रमाइलो हुने भएपनि कोरोना कहरले यो वर्ष समस्या निम्त्याएको सुर्नया ६का केशवदत्त अवस्थीले बताए । उनले यो वर्ष कोरोना कहरका कारण बसाइसराइ गरेर गएकाहरु फर्कन नपाएकाले गाउँमा अन्य वर्षको जस्तो रौनक नभएको बताए।
बैतडीमा विभिन्न मन्दिर तथा शक्तिपीठमा सामूहिक रुपमा जमरा राख्ने र दसैंको दिन सामूहिक रुपमै जमरा लगाउने चलन रहेको भएपनि यो वर्ष कोरोनाको जोखिम बढ्ने भएकाले सामूहिक रुपमा दसैं नमाउन सरकारले आग्रह गरेको छ ।
भीडभाडका कारण कोरोना जोखिम बढ्ने भएकाले घरमै दसैं मनाउन राम्रो हुने स्वास्थ्य कार्यालयका कोभिड १९ सम्पर्क व्यक्ति भुवनप्रसाद जोशीले जानकारी दिए । उनले भने, 'अहिलेको समयमा भीडभाड गरेर चाडपर्व मनाउनु निकै जोखिम छ । त्यसैले घरमै चाडपर्व मनाउनु निकै राम्रो हुनेछ ।'
कोरोनाकै कारण यो वर्ष बैतडीका शक्तिपीठहरुमा बलि दिन रोक लगाइएको छ । बलि सहित जात्रा मनाएमा भीडभाड हुन सक्ने भएकाले स्थानीय प्रशासनले जात्रा तथा मेलामा रोक लगाएको छ ।
प्रतिक्रिया दिनुहोस !
