बैतडी : बैतडीमा थप दुई जनामा कोरोना पुष्टि भएको छ । शनिबार डडेल्धुरा अस्पातलको प्रयोगशालामा भएको परीक्षणमा थप दुईजनामा कोरोना पुष्टि भएको स्वास्थ्य कार्यालयका कोभिड १९ सम्पर्क व्यक्ति भुवनप्रसाद जोशीले जानकारी दिए ।
दोगडाकेदार गाउँपालिका २ का २१ वर्षीय पुरुष र मेलौली नगरपालिका २ का २० वर्षीय महिलामा कोराना पुष्टि भएको हो । दुवैजना भारतबाट फर्केर होम क्वारेन्टाइनमा बसिरहेका बताइएको छ । दोगडाकेदारका संक्रमित पुरुष भने ३ हप्ताअघि भारतबाट फर्केका र मेलौलीका संक्रमित महिला एकहप्ता अघि भारतबाट स्वदेश फर्केका हुन् ।
शनिबार थप दुईजनामा कोरोना पुष्टि भएसँगै जिल्ला संक्रमितको संख्या ४६८ पुगेको छ । ४६८ जना मध्ये ४४२ जना निको भएर घर फर्केका छन् भने २५ जना सक्रिय संक्रमित रहेका छन् । एकजनाको भने बैतडीमा कोरोनाका कारण मृत्यु भइसकेको छ ।
सक्रिय संक्रमितमध्ये सबैभन्दा बढी दशरथचन्द नगरपालिकामा ६ जना रहेका छन् । यस्तै पाटन नगरपालिका र मेलौली नगरपालिकामा ५/५ जना सक्रिय संक्रमित रहेका छन् । यस्तै सुर्नया गाउँपालिकामा ३, डिलाशैनी गाउँपालिकामा २ जना, सिगास, पञ्चेश्वर, शिवनाथ र दोगडाकेदार गाउँपालिकामा १/१ जना सक्रिय संक्रमित रहेका स्वास्थ्य कार्यालयले जनाएको छ । हाल पुर्चौडी नगरपालिकामा भने सक्रिय संक्रमित शून्य रहेका स्वास्थ्य कार्यालयका कोभीड १९ सम्पर्क व्यक्ति भुवनप्रसाद जोशीले जानकारी दिए ।
पछिल्लो समयमा भारत तथा नेपालकै कोरोना प्रभावित क्षेत्रबाट फर्केका नागरिकहरुमा कोरोना पुष्टि हुन थालेपछि समुदायमा कोरोना फैलन सक्ने स्वास्थ्यकर्मीले चेतावनी दिएका छन् ।
प्रतिक्रिया दिनुहोस !
