बैतडी : बैतडीमा कुटपीटबाट एकजनाको मृत्यु भएको छ । पञ्चेश्वर गाउँपालिका ३ डुङरीका ३२ वर्षीय कमलबहादुर साउँदको मृत्यु भएको प्रहरीले जनाएको छ । साउँदलाई स्थानीय विरेन्द्र चन्द्र र ज्ञानेन्द्र चन्दले मदिरा सेवन गरे यही असोज ९ गते राती कुटपीट गरेको जिल्ला प्रहरी कार्यालयका प्रमुख प्रहरी नायव उपरीक्षक नारायणप्रसाद अधिकारीले जानकारी दिए ।
साउँदमाथि कुटपीट भएलगत्तै उनलाई उपचारका लागि धनगढी पठाएको र धनगढीमा उपचार सम्भव नभएपछि थप उपचारका लागि कोहलपुर पठाएको थियो । साउँदको कोहलपुर नपुग्दै सोमबार बाटोमै मृत्यु भएको प्रहरीले जनाएको छ ।
मृतकको शव पोष्टमार्टमका लागि जिल्ला अस्पताल बैतडीमा राखिएको छ । कुटपीटमा संलग्न भनिएका विरेन्द्र चन्द र ज्ञानेन्द्र चन्दलाई नियन्त्रणमा लिएर अनुसन्धान भइरहेको प्रहरी नायव उपरीक्षक अधिकारीले जानकारी दिए ।
उनले भने, 'घटनाका बारेमा थप अनुसन्धान गर्न म आफै घटनास्थल जाँदैछु । घटनाका कसरी भयो भन्ने विषयमा थप अनुसन्धान पछि मात्रै थाहा हुनेछ ।'
प्रतिक्रिया दिनुहोस !
