बैतडीमा ६ हजार बढीको परीक्षण, ४६८ जनामा कोरोना पुष्टि
कात्तिक १५, २०७७ शनिबार १२:४०:०
बैतडी : बैतडीमा ६ हजार बढी नागरिकको कोरोना भाइरस परीक्षण गरिएको छ । गएको चैत यता पीसीआर विधिबाट ६ हजार ८३ जनाको कोरोना परीक्षण गरिएको स्वास्थ्य कार्यालयका कोभीड -१९ सम्पर्क व्यक्ति भुवनप्रसाद जोशीले जानकारी दिए ।
कोरोना परीक्षणका लागि ६ हजार १२७ जनाको स्वाब संकलन गरिएकोमा ६ हजार ८३ जनाको कोरोना परीक्षण भइसकेको उनले बताए । ४४ जनाको मात्रै स्वाबको रिपोर्ट आउन बाँकी रहेको जोशीले जानकारी दिए । उनले भने ‘धेरैजसो भारतबाट फर्केका नागरिकको कोरोना परीक्षण गरिएको छ । यसका साथै पछिल्लो समयमा नेपालका पनि कोरोना प्रभावित क्षेत्रबाट आएका नागरिकको कोरोना परीक्षण गरिएको छ ।’
सबैभन्दा बढी पाटन नगरपालिकाका १ हजार ९४ जनाको कोरोना परीक्षण गरिएको छ भने दशरथचन्द नगरपालिकाका ५३२ जनाको कोरोना परीक्षण गरिएको छ । मेलौली नगरपालिकाका ५४४ जना, पुर्चौंडी नगरपालिकाका ७८५ जना, सिगास गाउँपालिकाका ४०९ जना र पञ्चेश्वर गाउँपालिका ५०७ जनाको कोरोना परीक्षण गरिएको छ । यस्तै सुर्नया गाउँपालिकाका ३५० जना,दोगडाकेदार गाउँपालिकाका ४ सय जना, डिलाशैनी गाउँपालिकाका ३४८ जना र शिवनाथ गाउँपालिकाका २६६ जनाको कोेरोना परीक्षण गरिएको स्वास्थ्य कार्यालयले जनाएको छ ।
यस्तै जिल्ला अस्पताल बैतडीमा विभिन्न ठाउँका ८४८ जनाको कोरोना परीक्षण गरिएको बताइएको छ । ६ हजार ८३ जना मध्ये ४६८ जनामा कोरोना पुष्टि भएको र बाँकी ५ हजार ६१५ जनाको कोरोना रिपोट नेगेटिभ आएको स्वास्थ्य कार्यालयका प्रमुख योगेशप्रसाद भट्टले जानकारी दिए । ४६८ जना संक्रमितमध्ये १४ जना मात्रै सक्रिय संक्रमित रहेका छन् भने १ जनाको मृत्यु भइसकेको छ । जिल्लामा ४५२ जना कोरोना जितेर घर फर्किसकेका स्वास्थ्य कार्यालयले जनाएको छ ।
सक्रिय संक्रमितमध्ये सबैभन्दा बढी दशरथचन्द नगरपालिकाका ६ जना रहेका छन् । यस्तै पाटन नगरपालिका र डिलाशैनी गाउँपालिकामा २/२ जना सक्रिय संक्रमित रहेका छन् । जिल्लाको शिवनाथ, पञ्चेश्वर, सिगास र दोगडाकेदार गाउँपालिकामा १/१ जना सक्रिय संक्रमित रहेका बताइएको छ। हाल पुर्चौंडी नगरपालिका र सुर्नया गाउँपालिकामा सक्रिय संक्रमित छैनन् ।
गएको असोज १ गतेदेखि जिल्ला अस्पातलमै कोरोना परीक्षण हुन थालेपछि सजिलो भएको छ । जिल्ला अस्पतालमा प्रदेश सरकारको सहयोगमा पीसीआर प्रयोगशाला स्थापना भएपछि करिब डेढ हजार जनाको कोरोना परीक्षण गरिएको अस्पातलका वरिष्ठ ल्याब असिष्टेन्ट चन्द्रसिंह डोबालले बताए ।
प्रतिक्रिया दिनुहोस !
