बेंसीसहर : जिल्ला प्रहरी कार्यालय लमजुङले अवैध जढिबुटी कारोबार गर्ने ५ जनालाई पक्राउ गरेको छ । १९ लाख ३२ हजार २ सय ९० रुपैयाँ बराबरको अवैध जडिबुटीसहित ५ जना कारोबारीलाई पक्राउ गरिएको प्रहरीले जनाएको छ ।
मनाङबाट बेंसीसहर आउँदै गरेको ग १ ज ७४५३ नम्बरको पिकअप भ्यानबाट १६ किलो जटामसी, १ सय २४ किलो बुकीफूल, ५३ किलो धुपीपात, ९ किलो सुनपाती, १३ किलो भोजपत्र गरी २ सय १५ किलो जडिबुटी बरामद गरिएको प्रहरी प्रमुख डिएसपी गंगाबहादुर थापाले जानकारी दिए ।
अवैध रुपमा जडिबुटी ओसारपसारमा संलग्न मनाङको नार्पाभूमि गाउँपालिका २ का ४५ वर्षीय लाम्पा छिरिङ लामा र मनाङ ङिस्याङ गाउँपालिका ३ की २९ वर्षीया पल्मु लामासहित जिप चालक लमजुङको दोर्दी गाउँपालिका ८ का ३१ वर्षीय कर्ण गुरुङलाई पक्राउ गरिएको प्रहरीले जनाएको छ ।
अवैध जडिबुटी र ओसारपसारमा संलग्न व्यक्ति पक्राउ पछि विशेष सूचनाको आधारमा बेंसीसहरका २ घरमा खानतलासी गर्दा बेंसीसहर नगरपालिका ८ की ४४ वर्षीया शान्ताकुमारी तामाङ र ४६ वर्षीय मीनबहादुर तामाङ पनि जडिबुटीसहित पक्राउ परेका छन् ।
शान्ताको घरबाट प्रतिबन्धित जडिबुटी पाँचऔंले ८ किलो बरामद गरिएको थियो । मिनबहादुरको घरबाट साढे ३ किलो पाँचाऔंले, निरमसी ५३ किलो, मजिठो १४ किलो, पिप्ला २ सय ४१ किलो, सतुवा साढे ८ किलो, जटामसी साढे २ किलो, ढालिङ १ सय ६ किलो, कुड्की ५४ किलो गरी कूल ४ सय ८२ किलो अवैध जडिबुटी बरामद गरिएको डीएसपी थापाले बताए ।
बरामद गरिएको जडिबुटीसहित ५ जनालाई आवश्यक कारबाहीको लागि आइतबार डिभिजन वन कार्यालय लमजुङ पठाइएको छ । डिभिजन वन अधिकृत पूर्णेश्वर सुवेदीले अवैध जडिबुटीसहित ओसारपोसारमा संलग्न व्यक्तिलाई अनुसन्धान गरी कानुन बमोजिम कारबाही गरिने बताए ।
प्रतिक्रिया दिनुहोस !
