महेन्द्रनगर : खाद्य व्यवस्था तथा व्यापार कम्पनी लिमिटेड कञ्चनपुरले बुधबारदेखि किसानका धान खरिद सुरु गरेको छ । कम्पनीले कोरोना जोखिमलाई मध्यनजर गर्दै टोकन प्रणालीबाट धान खरिद गर्न सुरु गरेको खाद्य व्यवस्था तथा व्यापार कम्पनी लिमिटेड कञ्चनपुरका शाखा प्रमुख तपेन्द्र प्रसाद उपाध्यायले जानकारी दिनुभयो । सरकारले गत असार महिनामै धानको समर्थन मूल्य तोके अनुरूप कञ्चनपुरमा पनि टोकन प्रणालीबाट धान खरिद सुरु गरिएको हो ।
कम्पनीले यस वर्ष कञ्चनपुरमा सात हजार क्वीन्टल धान खरिद गर्ने लक्ष्य लिएको छ । 'हामीले यसपटक ७ हजार क्वीन्टर धान खरिद गर्ने लक्ष्य लिएका छौं,' शाखा प्रमुख उपाध्यायले भने, 'विगतको तुलनामा यस पटक किसानको चाप धेरै छ ।'
उनले यसपटक सरकारले धानको मुल्य समयमै तोकेको र धानको मुल्य पनि यसपटक राम्रो भएकाले किसानको चाप बढेको बताए । 'विगतका वर्षमा किसानबाट व्यापारीले धान सस्तोमा दरिद गरेर महंगोमा बेच्थे, उनले भने, 'सरकारले यसपटक किसानले उत्पादनको लाभ लिने गरी मुल्य तोकेको छ ।'
उनले बिचौलीयालाई निरुत्साहित गर्न पनि किसानलाई लक्षित गरेर यसपटक खाद्यले धान खरिद गरिरहेको बताए । कम्पनीले विगतमा जिल्लाका अन्य ठाउँमा समेत धान खरिदका लागि केन्द्रहरु स्थापना गर्ने गरेको भएपनि कर्मचारी र भौतिक पूर्वाधारको अभावमा यसवर्ष भने महेन्द्रनगरस्थित कार्यालयमा मात्रै धान खरिद गर्ने जनाएको छ ।
हाल दैनिक ६ सय क्वीन्टल धान खाद्य व्यवस्था तथा व्यापार कम्पनी लिमिटेड कञ्चनपुरले जनाएको छ । सरकारले मोटा धानको मूल्य प्रतिक्विन्टल २ हजार ७ सय ३५ रुपैयाँ र मध्यम धानको २ हजार ८ सय ८५ रुपैयाँ तोकेको थियो ।
प्रतिक्रिया दिनुहोस !
