वासिंटन : अमेरिकी राष्ट्रपति डोनल्ड ट्रम्पले प्रतिस्पर्धी जो बाइडेनलाई विजयी भएको घोषणा नगर्न चेतावनी दिएका छन् ।
ट्रम्प स्वयंले भने यसअघि नै आफू विजयी भएको घोषणा गरिसकेका थिए । तर पछिल्लो परीणाम अनुसार डेमोक्रेटिकका तर्फबाट राष्ट्रपतिका उम्मेदवार जो बाइडेन जित नजिक पुगेका छन् । निर्णायक मानिएको राज्य पेन्सिल्भेनियामा पनि बाइडेनले अग्रता कायम गरेका छन् । र अब मतगणना अन्तिम चरणमा पुगेको अवस्थामा बाइडेनले नै चुनाव जित्ने आंकलन गरिएको छ ।
पेन्सिल्भेनियाबाट प्राप्त हुने २० इलेक्टोरल भोटबाट नै बाइडेन ह्वाइट हाउस छिर्ने बाटो तय हुनेछ । बाइडेनले यसअघिको सम्बोधनको क्रममा आफू जितको बाटोमा रहेको बताएका थिए । ट्रम्पले भने आफूले जितिसकेको तर मतगणनामा धाँधली गरिएको भन्दै बाइडेनमाथि आरोप लगाएका थिए ।
साथै उनले केही राज्यमा त मतगणना रोक्न र प्रक्रिया फेरि सुरु गर्न भन्दै अदालतमा मुद्दा दायर नै गरेका थिए । तर उनको मुद्दा अदालतले खारेज गरिसकेको छ । निर्णायक मानिएका राज्यहरु पेन्सिल्भानिया, जर्जिया, नेभाडा र एरिजोनामा पनि बाइडेन नै अगाडि भएको अवस्थामा लगभग उनी जितको निकट छन् ।
प्रतिक्रिया दिनुहोस !
