वासिङटन : जो बाइडेनले राष्ट्रपति बनेपछि पहिलो निर्णयको रुपमा १३ वटा मुस्लिम वाहुल्य देशबाट यात्रा प्रतिबन्ध लगाइएका मुस्लिमहरुको प्रतिबन्ध फकुवा गर्ने प्रतिवद्धता गरेका छन् ।
डोनल्ड ट्रम्पले यसअघि नै २०१७ मा विशेष आदेश दिँदै विभिन्न सात मुस्लिम वाहुल्य देशबाट अमेरिका यात्रा प्रतिबन्ध लगाएका थिए । पछि त्यसलाई बढाएर १३ देशबाट यात्रा गर्न नपाउने बनाए ।
ट्रम्प प्रशासनले धेरै पटक कानुनी चुनौतीका बावजुद उक्त आदेशमा परिमार्जन गरेको थियो । तर यस्ता आदेश र राष्ट्रपतिको घोषणाबाट जारी गरिएका प्रतिबन्ध सजिलै फिर्ता लिन सकिने बताइन्छ ।
बाइडेनले गत अक्टोबरमा अमेरिकामा बढ्दै गरेका अपराधविरुद्धको कानुन बनाउन राजनीतिज्ञहरुलाई दबाब दिने पनि वाचा गरेका थिए । ‘मेरो प्रशासन हरेक तहमा मुस्लिम अमेरिकनहरुले सेवा गर्न पाउने सुविधा सहितको अमेरिका जस्तो हुनेछ । म राष्ट्रपतिको रुपमा समाजमा फैलिएको घृणा हटाउन तपाईँहरुसँगै हुनेछु,’ बाइडेनले भनेका थिए ।
बाइडेनले अघि भनेका थिए, ‘पहिलो दिनमै म ट्रम्पको असंवैधानिक मुस्लिम प्रतिबन्ध फुकुवा गर्नेछु ।’
ट्रम्पले भने इरान, लिबिया, सोमालिया, सिरिया र यमनबाट अमेरिका यात्रा गर्न नपाउनेगरी यात्रामा प्रतिबन्ध लगाएका थिए । गैरकानुनी र धार्मिक विभेद भएको भन्दै कडा आलोचनाका बावजुद ट्रम्पले यस्तो निर्णय गरेका थिए । पछि उनले भेनेजुएला, उत्तर कोरिया, नाइजेरिया, सुडान, म्यानमार लगायत देशबाट पनि अमेरिका प्रवेश गर्न नपाउने निर्णय गरेका हुन् ।
त्यसो त, कोरोना महामारीका बीच अमेरिकामा निर्वाचन सम्पन्न भयो । डेमोक्रेटिक पार्टीका नेता जो बाइडेन ४६औँ राष्ट्रपतिको रुपमा निर्वाचित भए ।
उनले कडा प्रतिस्पर्धासँगै ट्रम्पलाई हराए । जब कि, बाइडेनसँगै अमेरिकी मुस्लिम, अल्पसंख्यक, अस्वेत र आप्रवासी समुदायको ठूलो सपना जोडिएको छ । चुनावअघि देखि नै बाइडेनले आप्रवासीको साथ पाएका हुन् । त्यसैले पनि उनले उपराष्ट्रपतिको रुपमा कमला ह्यारिसलाई अघि सारे । आफ्नो सल्लाहकार नै भारतीय मूलका विज्ञलाई नियुक्त गरे ।
समग्रमा बाइडेनप्रति ठूलो आप्रवासी र मुस्लिम समुदायको सपना जोडिएको छ । ट्रम्पले आप्रवासी, मुस्लिम, अस्वेत, महिला र तेस्रोलिंगीहरुविरुद्ध कडा टिप्पणी गर्ने भएकाले पनि अल्पसंख्यक समुदायको ठूलो हिस्सा बाइडेनको पक्षमा थियो ।
अमेरिकी राजनीतिक विश्लेषकहरुका अनुसार अब बाइडेनले ट्रम्पले गरेका कतिपय निर्णय उल्ट्याउनुपर्ने बाध्यता पनि देखिनेछ । जबकि, कतिपय सन्दर्भमा अमेरिकामा बढ्दै गरेको अपराध, हिंसाको कारण आप्रवासन सम्बन्धी खुकुलो नीतिलाई पनि लिइने गरिएको छ ।
ट्रम्प यस्ता मुद्दामा कठोर रुपमा अडिग हुने भएकाले एउटा तप्का उनको पक्षमा खुलेरै लाग्ने गरेको थियो । अमेरिकालाई सधैँ सुरक्षित राख्न चाहने ठूलो हिस्साले ट्रम्पलाई नेता मान्नुको कारण पनि त्यही थियो । बाइडेन भने यस्ता कतिपय कुरामा लचिलो मानिन्छन् । परराष्ट्र मामिलामा विज्ञता हुँदा हुँदै बाइडेनका लागि राष्ट्रिय सुरक्षा तथा अपराध नियन्त्रणको रणनीति चुनौतीको रुपमा देखिनसक्छ ।
प्रतिक्रिया दिनुहोस !
