मलंगवा : सात सन्तान सहित झुपडीमा बस्दै आएकी चक्रघट्टा गाउँपालिका ६ गोइयाहीकी सुनिता देवी महतोले घर पाएकी छन् । पूर्व सभासद नरेन्द्र साहले उनलाई घर बनाइदिएका हुन् ।
गत वर्ष वर्षाका कारण फुसको घर भत्केपछि उनी सात सन्तान सहित झुपडीमा बस्दै आएकी थिइन् । ३ वर्ष पहिले श्रीमान् राजेन्द्र महतोको मृत्यु भएपछि आर्थिक अभावलले थलिएकी सुनिता गाउँघरमा मागेरै ७ सन्तानलाई पाल्दै आएकी थिइन् ।
सम्पतिको नाउँमा ५ धुर घडेरी मात्र रहेको सुनितालाई सन्तान पाल्नु की घर बनाउने चिन्ता थियो । पूर्व सभासद साहले घर बनाई दिएपछि उनी अहिले दंग परेकी छिन् । गतवर्ष फागुन १२ गते “मागेरै सात सन्तानको गुजारा” भन्ने शिर्षकमा अन्नपूर्णमा समाचार छापिएपछि सभासद साहले घर बनाइदिएका छन् ।
‘श्रीमानको मृत्यु भएपछि बिच्चलीमा परेको थियौं’, सुनिताले भनिन्, ‘गाउँघरमा आफु सहित दुई सन्तान मागेर ल्याएपछि गुजारा चल्थ्यो । परिवार पाल्नु कि घर बनाउनु भन्ने चिन्ता थियो । पूर्व सभासद साहले घर बनाइदिएपछि झुपडीको बासबाट छुटकरा मिलेको छ ।’
साहले दुई तल्ले काठको घर र पक्की चर्पी बनाइदिएका हुन् । एक वर्षदेखि झुपडीमा बस्दैआएकी सुनिताको साथमा ५ छोरी र २ छोरा छन् । एउटा कुनामा चुल्हो र अर्को कुनामा सबैजनाको बसोबास थियो । अहिले तल भान्सा घर र माथि सबैजना बस्ने गरेका छन् । घर बनाइदिएर पूर्व सभासद साहले गुण लगाएको सुनिता बताउँछिन् ।
कान्छो छोरा पेटमै रहेको बेला श्रीमानको मृत्यु भएको सुनिताले बताइन् । छोरीहरु गाउँबाट मागेर ल्याएर सानो छोरालाई पालन पोषण गर्थे । अब ज्याला मजदुरी गरेर सन्तान पाल्ने बताउँछिन् सुनिता । आर्थिक अभावका कारण सन्तानलाई स्कुल समेत पठाउन नसकिएको उनी बताउँछिन् । अब छोराछोरीलाई पनि स्कुल पठाउने उनले बताइन् । घर बनेपछि व्यापार गर्ने योजना रहेको पनि उनले सुनाइन् ।
अन्नपूर्णमा छापिएको समाचार पढेपछि आफु घर बनाउन गाउँमा आएको सभासद साहले बताएका छन् । ‘अन्नपूर्णमा समाचार पढेपछि गाउँमा उनको अवस्था हेर्न आएका थियौं । अवस्था निकै दयनीय देखेपछि सहयोग गर्न मन लाग्यो,’ साहले भने ।
साहले काठको दुईतल्ले घर बनाइ शनिबार बेलुका हस्तान्तरण गरेका छन् । हस्तान्तरणको समयमा सभासद साहले बालबालिका सहित सुनितालाई नयाँ लुगा पनि बितरण गरे । यसअघि समाचार पढेरै ललितपुर नगरपालिका १ कुपण्डोलका बलराम केसीले २५ हजार सहयोग गरेका थिए ।
प्रतिक्रिया दिनुहोस !
