वासिङटन : अमेरिकाको सबैभन्दा बढी उमेरको राष्ट्रपति बनेका जो बाइडेन सबैभन्दा कान्छो सांसद पनि हुन् । ३६ वर्षसम्म सांसद रहेका बाइडेनले ४६ वर्षको सक्रिय राजनीति गरेका छन् ।
राजनीतिमा उच्चतम सफलता र खुसी प्राप्त गरेका बाइडेनले व्यक्तिगत र पारिवारिक जीवनमा ठूलो क्षति भोगेका छन् । सामान्य परिवारबाट आएर पनि अमेरिकी राजनीतिको उच्चतम तहमा पुगेका उनका केही गोप्य तथ्यहरु :
पेन्सिल्भेनियाको बसाइ
बाइडेनको बाल्यकाल पेन्सिल्भेनियामै बित्यो । उनी त्यही राज्यमा जन्मिएका थिए । पेन्सिल्भेनिया, जुन राज्य नै अहिले बाइडेनलाई राष्ट्रपति पदमा जिताउने निर्णायक राज्यको रुपमा चिनियो ।
अंकलको घर
बाइडेन जतिबेला १० वर्षका थिए, त्यसबेला उनको परिवार विलमिङटनस्थित डेलावारमा अंकलको घरमा गएर बस्न थाले । एउटा सानो र साँघुरो घरमा उनीहरु कोचिएर बस्न बाध्य भएका थिए । जहाँ बाइडेनका तीन दाजुभाइ एउटै कोठामा ओछ्यान सेयर गरेर बस्नु परेको थियो ।
बाइडेनको भकभकाउने बानी
बाइडेन सानो छँदा भकभकाएर बोल्ने गर्थे । उनको यस्तै बानीले गर्दा कक्षामा साथीहरु उनलाई ‘भकभके’ भनेर पनि जिस्क्याउने गर्थे । यस्तो बानी सुधार्न उनले सिंगो अनुच्छेद स्मरण गर्दै एकै चोटि पढ्ने बानी बसाले । कक्षामा पढ्दा पनि उनी यस्तै अभ्यास गर्थे ।
क्लास प्रेसिडेन्ट
बाइडेन ‘आर्कमेर एकेडेमी’ एउटा क्याथोलिक स्कुलमा पढेका थिए । जहाँ उनी क्लास प्रेसिडेन्ट समेत बनेका थिए ।
फुटबलर
स्कुलमा छँदा उनी कुशल फुटबल खेलाडी थिए । स्कुले जीवनमा उनले ‘वाइड रिसिभर’को रुपमा आफ्नो फुटबलको कौशल देखाए ।
बहमासमा निलियासँग भेट
बाइडेनले पत्नी निलिया हन्टरसँग बहमासमा कलेजको बिदा मनाउन जाने क्रममा पहिलो पटक भेट गरेका थिए । त्यो भेट एक बसन्तमा भएको थियो ।
पैसा अभाव
निलियासँ डेटिङ जाँदा उनीसँग रेष्टुरेण्टमा बिल तिर्ने पैसा पनि बाइडेनसँग थिएन । निलियाले २० डलर टेबुलमुनिबाट दिएकी थिइन् ।
निलियासँग विवाह
निलियासँग उनले १९६६ मा विवाह गरेका थिए । र १९६९ मा छोरा बेउ १९६९ जन्मिए । त्यसपछि अर्को वर्ष उनीहरुबाट छोरी नाओमी जन्मिइन् ।
भियतनाम युद्धको बेला
भियतनाममा अमेरिकाले युद्ध गरिरहँदा बाइडेन कानुनको पढाइ भर्खरै सक्दै थिए । त्यसबेला अधिकांश विद्यार्थी भियतनाममा युद्ध अन्त्यको लागि विशाल प्रदर्शन गरिरहँदा बाइडेन भने सिनेटमा छिर्ने प्रयत्नमा थिए । अन्ततः उनी ३० वर्षको उमेरमै सिनेटर बन्ने मौका पाए ।
उमेर
बाइडेन ७८ वर्षका भए । र उनी नै अमेरिकाको इतिहासमा सबैभन्दा बढी उमेरको राष्ट्रपति हुन् । उनका बाबु ८६ वर्षको उमेरमा बितेका थिए । आमा चाहिँ ९२ वर्षको उमेरमा ।
पारिवारिक बियोग
बाइडेन जब पहिलो पटक सिनेटमा छिरेका थिए । उनी निर्वाचित भएको केही सातामै उनकी पत्नी निलियासहित तीन सन्तानको एउटा ठूलो सवारी दुर्घटनामा परेर मृत्यु भयो । क्रिसमस ट्री ल्याउँदै गरेका उनीहरुको गाडीलाई ट्रकले ठक्कर दिएर उनीहरुको मृत्यु भएको थियो ।
दोस्रो विवाह
बाइडेनले १९७७ मा अर्को विवाह गरे । पहिलो पत्नीको मृत्युपछि जील ट्र्यासी ज्याकोब्ससँग उनले दोस्रो विवाह गरेका हुन् । जील अंग्रेजी शिक्षिका थिइन् ।
इराक युद्धका लागि मतदान
२००२ मा बाइडेनले इराक युद्धको पक्षमा संसदमा मतदान गरेका थिए । र तत्कालिन राष्ट्रपति जर्ज डब्लु बुसले इराकमा शक्ति प्रयोग गर्ने प्रस्तावमा हस्ताक्षर गरिरहँदा बाइडेन ह्वाइटहाउसमै उपस्थित थिए । तर बाइडेनले संसदको उक्त मतदानलाई गल्तीको रुपमा आत्मालोचना गरेका छन् ।
राष्ट्रपति पदमा उम्मेदवारी
बाइडेनले २००८ मा नै दोस्रो पटक राष्ट्रपति पदमा उठ्ने तयारी गरेका थिए । तर प्रारम्भिक छनोट प्रक्रियाबाट उनी बाहिरिनु परेको थियो । उनको नाम पार्टीभित्र पाँचौ तहमा आएपछि उनी पछि हटेका थिए । तर सात महिनापछि बाराक ओबामाले उनलाई उपराष्ट्रपतिको रुपमा चयन गरे ।
समलिंगी विवाहको समर्थन
बाराक ओबामा २०१२ मा दोस्रो पटकको राष्ट्रपति पदमा उम्मेदवारी दिएर चुनावी अभियानमा छँदा बाइडेनले भने समलिंगी विवाहको पक्षमा उभिएर ओबामाप्रति रोष प्रकट गरे ।
छोराको मृत्यु
बाइडेनका जेठो छोरा बेउको ब्रेन क्यान्सरबाट २०१५ मा मृत्यु भयो । यसकारण पनि उनले पारिवारिक बियोग धेरै पटक भोगेका छन् ।
गरिब उच्च अधिकारी
बाइडेन अमेरिकी उच्च पदस्थ अधिकारीमध्ये सबैभन्दा कम धनीमध्ये पर्छन् । ५ सय ८१ जना उच्चपदस्थ अधिकारीमध्ये उनको नाम ५ सय ७७औँ स्थानमा पर्छ । उनको पारिवारिक पृष्ठभुमि पनि सामान्य नै थियो ।
मनपर्ने फिल्म
बाइडेनलाई मन पर्ने फिल्म ‘च्यारिअट्स अफ फायर’ हो । जुन बेलायती ऐतिहासिक ड्रामामा आधारिक फिल्म हो । उक्त फिल्म १९२४ को ओलम्पिकमा खेलेका त्यहाँका दुई धावकहरुको सत्य कथामा आधारित छ ।
रेस्लिङको चेतावनी
उनले एकपटक त एक जना रिपोर्टरलाई रेस्लिङ प्रतिस्पर्धाको लागि चेतावनी समेत दिएका थिए ।
सबैभन्दा जेष्ठ र अनुभवी
बाइडेन सबैभन्दा जेठो उमेरको अमेरिकी राष्ट्रपति मात्रै हैन । अमेरिकी राजनीतिमा सबैभन्दा धेरै वर्ष बिताएको र जीवीत नेता उनै हुन् । जसले ४६ वर्ष राजनीतिमा बिताइसकेका छन् । जबकि, उनका समकालिन र उनका सिनियरहरुमध्ये राजनीतिमा सक्रिय उनी मात्रै हुन् ।
प्रतिक्रिया दिनुहोस !
