बैतडी : भारतको झुलाघाट नाका भएर अवैध रुपमा नेपाल भित्र्याएको बिँडी सशस्त्र प्रहरीको गस्ती टोली बरामद गरेको छ । भारतबाट किनेर महाकाली नदीमा ट्युब मार्फत नेपाल ल्याएको बिँडी दशरथचन्द नगरपालिका ६ सुकुट्टीबाट बरामद गरिएको सशस्त्र प्रहरी बल नेपाल नम्बर ५१ गुल्म बैतडीका सशस्त्र प्रहरी नायव उपरीक्षक गणेश शाहले जानकारी दिए ।
सीमा नाका झुलाघाटमा रहेको सशस्त्र प्रहरीको बीओपीबाट खटिएको गस्ती टोलीले शनिबार राती १ लाख ३२ हजार बराबरको ६ पेटी बिँडी बरामद गरेको हो । बिँडी ल्याउने मान्छे भने सशस्त्रको टोली देख्ने बित्तिकै भागेको जनाइएको छ । उनले भने, 'हामीले शनिबार राती गस्तीको क्रममा अवैध रुपमा नेपाल भित्र्याएको बिँडी बरामद गरेका थियौं । बिँडी ल्याउने मान्छे भने गस्ती टोली देख्ने बित्तिकै भागेर गइहाले ।'
बरामद गरिएको बिँडी आइतबार महाकाली भन्सार कार्यालय झुलाघाटलाई बुझाइएको सशस्त्र प्रहरी नायव उपरीक्षक शाहले जानकारी दिए । भारतसँग सीमा जोडिएको झुलाघाट नाका बन्द हुँदा महाकाली नदीमा ट्युबमार्फत अवैध सामान ल्याउने क्रम रोकिएको छैन् ।
पछिल्लो समयमा सीमामा सशस्त्र प्रहरीको बीओपी स्थापना भएपछि अवैध रुपमा भित्र्याएको सामग्री बरामद हुन थालेको छ । सीमा क्षेत्रमा सशस्त्रले गस्ती बढाएको र अवैध रुपमा ल्याउने सामग्री रोक लगाउने गरेको सशस्त्र प्रहरी नायव उपरीक्षक शाहले जानकारी दिए ।
प्रतिक्रिया दिनुहोस !
