निर्माण सुरु नहुँदै तामाकोशी–बाह्रविसे प्रशारणलाइन विवादमा

दोलखा : निर्माण सुरु नहुँदै २२०/४०० केभी क्षमताको तामाकोशी–बाह्रविसे प्रशारणलाइन आयोजना विवादमा परेको छ ।तामाकोशी–काठमाडौं प्रसारणलाइन आयोजना अन्तर्गत तामाकोशी–बाह्रबिसे २२०/४०० केभी प्रसारणलाइन आयोजना विवादमा परेको हो ।

नेपाल विद्युत् प्राधिकरण, नेपाल सरकार र एशियाली विकास बैंकको ऋण तथा अनुदान सहयोगमा निर्माण हुने तामाकोशी–बाह्रविसे प्रशारणलाइन आयोजना मुआब्जाका कारण विवादमा परेको हो ।

मेलुङ गाउँपालिका–४, भेड्पुमा पर्ने २ वटा टावरको मुआव्जा कस्ले लिने भन्ने बिषयमा आयोजनाको निर्माण सुरु नै नभई विवाद सुरु भएको हो । भेड्पुमा सो प्रशारणलाइनको ८ र ८/२ नम्बरको २ वटा टावर निर्माण गर्नुपर्ने हुन्छ । सो टावरको लागि अधिग्रहण गर्ने जग्गाको मुआब्जा स्थानीय भोगचलनकर्ताले पाउनुपर्ने स्थानीय शिवप्रसाद भण्डारीले बताए । भेड्पुमा गुठी र स्थानीयको विवादको कारण हालसम्म नापी हुन सकेको छैन ।

सोही विवाद सल्टाउन बुधबार जिल्ला समन्वय समिति दोलखामा बसेको बैठकले भेड्पुमा निर्माणस्थल परेमा सो स्थानमा रहेको कुनैपनि नागरिकको जग्गाको नापी नभएको हुँदा मुआब्जा साविकका दर्ता, ७ नं.फाराम र तिरो तिरेको रसिदका आधारमा बनेका पूर्वाधार छन् भने सो को नियमानुसारको क्षतिपूर्ती उपलब्ध गराउन सम्वन्धित निकायमा अनुरोध गर्ने निर्णय गरेको छ । सरकारको नियमानुसार मुआब्जा तथा क्षतिपूर्ती उपलब्ध गराईने तामाकोशी–बाह्रबिसे प्रशारणलाइन आयोजनाका प्रमुख रमणदास शर्माले जानकारी दिए ।

प्रशारणलाइनको भारतीय ठेकेदार कम्पनी केइसी इन्टरनेशनल लिमिटेडले ठेक्का पाएको छ । रामेछापको फुलासीदेखि बाह्रबिसेसम्मको तामाकोशी–बाह्रबिसे प्रशारणलाईनको करिब ४४ किलोमिटर लम्बाइको ठेक्का केइसी इन्टरनेशनलले १ करोड ७३ लाखमा लिएको हो ।

रामेछापको फुलासीदेखि बाह्रबिसेसम्म ११४ ओटा टावर बन्नेछन्, जसमध्ये रामेछापमा २ ओटा, दोलखामा ८५ ओटा र सिन्धुपाल्चोकमा २७ ओटा पर्दछन् । सन् २०१९ मे २० मा प्राधिकरणसँग सम्झौता भएको प्रसारणलाइन निर्माण १२ अक्टोबर २०२१ सम्ममा पूरा गर्नुपर्नेछ ।