घरमा स–साना नानीहरू
नाङ्लाभरि सेलरोटीको आशमा
बालकहरूको मुहारमा
तिहारको लाली पोतिएको छ
त्यसैले, डालोभरि सयपत्री बोकेर
बजार झरेकी म फूल बेचेर
तिहार किन्न आएकी ।
आँगनभरि फुलेका फूलहरूले
तिहार बोलाइसक्दा पनि
जीवनमा तिहार दीपावलीजस्तै
प्रज्वलित भएर आएको छैन
सुन्ति आउने दिन
औला भाँच्दै गनिरहेका
नानीहरूको गालामा खुसी छर्न
बजार झरेकी म फूल बेचेर
तिहार किन्न आएकी ।
तिहारमा बल्ने पालाचासँगै
बाल्न चाहन्छु खुसीको दियो
अनि बनाउन चाहन्छु उज्यालो घर
विस्मृत देउसी र भैलोको लयमा
फेरि फर्काउने चाह छ मनभरि
आफूलाई मादलको तालमा
फेरि मजुरे नाँच नचाउने
आकांक्षा छ, त्यसैले त
डालोभरि मखमली बोकेर
बजार झरेकी म फूल बेचेर
तिहार किन्न आएकी ।
गरिबलाई ऋणबाट
मुक्त गरेको उत्सव आँखामा राखेर
गोदावरीजस्तै जिन्दगी पनि
फुलाउने मन छ
सानीनानीले दाजुलाई टीका लगाउँदै
दीर्घायूको कामना गरेको हेर्ने मन छ
मलाई अरूको घरमा जस्तै
आफ्नो घरमा पनि तिहार फुलेको
हेर्ने इच्छा छ ।
त्यसैले त, आँगनभरि फुलेका
गोदावरी, मखमली, सयपत्रीसँगै
तिहारमा दीपावली भित्र्याउने
सपना पाल्दै डालोभरि गोदावरी बोकेर
बजार झरेकी म फूल बेचेर
तिहार किन्न आएकी ।
प्रतिक्रिया दिनुहोस !
