बैंकक : थाइल्याण्डमा यहाँका हाइस्कुलका विद्यार्थीले नेतृत्व गरेको प्रदर्शनमा हजारौँ मानिसले सहभागिता जनाएका छन् ।
राजतन्त्रको शक्ति दुरुपयोगको विरोध तथा सरकार विघटनको माग गर्दै उनीहरुको आन्दोलन व्यापक रुपमा फैलिएको छ । विशेषगरी शिक्षामा पुनर्संरचना लगायत माग गर्दै सुरु गरेको आन्दोलनमा राष्ट्रिय राजनीतिक एजेन्डा पनि समेटिएका छन् ।
शनिबार राजधानी बैंककमा सुरु भएको उनीहरुको प्रदर्शनमा हजारौँको सहभागिता थियो । प्रधानमन्त्री प्रयुथ चान ओचाको राजीनामा माग्दै गरिएको यस प्रदर्शनलाई एक प्रमुख आन्दोलन मानिएको छ । जबकि, प्रधानमन्त्रीले प्रहरीलाई प्रदर्शनकारीविरुद्ध जस्तोसुकै कानुनी कारवाही बढाउन आदेश दिएका छन् ।
‘हामी यहाँ हाम्रो खोसिएको स्वतन्त्रता फेरि स्थापना गर्न र शिक्षालाई पुनस्थापना गर्न आएका हौँ । हामी वास्तविक संवैधानिक राजसंस्था चाहन्छौँ,’ हाइ स्कुलका १८ वर्षीय एक विद्यार्थी मामेवले बताइन् । उनले सुरक्षाका कारण मिडियासामु आफ्नो पूरा नाम भने खुलाइनन् ।
गत जुलाईदेखि नै यहाँको सरकार र राजतन्त्र विरुद्ध विभिन्न आन्दोलन हुँदैआएका छन् । राजा महा वजिरलंकोर्न कोरोना महामारी सुरु भएसँगै यूरोपको आलिशान रिसोर्टमा युवतीहरुसहित आराम गर्न गएपछि पनि यहाँ उनीविरुद्ध आन्दोलन भएको थियो ।
पछिल्लो समय थाइल्याण्डको राजसंस्था र सरकार जनताहरुमाझ आलोचित बन्दैआएका छन् । गत महिना मात्रै रानी चढेको गाडीमा समेत प्रदर्शनकारीको भीडले ठूलो अवरोध सिर्जना गरिदिएको थियो । तर सरकारले प्रदर्शनमा सहभागी नागरिक अगुवा तथा नेताहरुविरुद्ध गम्भीर प्रकृतिका मुद्दा दायर गरेको थियो ।
प्रतिक्रिया दिनुहोस !
