इथियोपियामा द्वन्द्व बढ्दै, सरकारी फौजले सहर कब्जा गर्यो
इथियोपिया : इथियोपियाका प्रधानमन्त्री अबी अहमेदको कार्यालयका अनुसार यहाँको सरकारी सुरक्षा फौजले अदिग्रत सहर कब्जामा लिएको छ ।
प्रधानमन्त्रीको कार्यालयले यही शनिबार यस्तो घोषणा गरेको हो । जसअनुसार उत्तरी तिग्रे क्षेत्रको राजधानी मेकेले पनि कब्जा गर्ने तयारीमा रहेको बताइएको छ । तिग्रे पिपल्स लिबरेसन फ्रन्टका अनुसार संघीय फौजले सहर कब्जा गर्ने क्रममा ९ जना आम नागरिक घाइते भएका छन् ।
स्थानीय समाचार अनुसार तिग्रे क्षेत्रमा यही महिनाको सुरुदेखि नै विद्रोही समूहहरु सक्रिय हुन थालेका छन् । नोभेम्बर ४ मा विद्रोही तिग्रेको आक्रमणमा केही नागरिकको ज्यान गएको थियो ।
पछिल्लो समय इथियोपियाका विभिन्न क्षेत्रमा सशस्त्र द्वन्द्व बढ्न थालेपछि हजारौँको संख्यामा मानिसहरु सुडानतर्फ विस्थापित भएका छन् । यद्यपि अफ्रिकन युनियनले विद्रोही समूह र सरकारबीच वार्ताको लागि आफूले विशेष मध्यस्तता गर्ने घोषणा गरेको छ ।