मुम्बई : केही महिनाअघि मनोरञ्जन जगत्लाई नै सदाका लागि ‘गुडबाई’ भनेकी बलिउड अभिनेत्री सना खान अहिले विवाहका कारण चर्चामा छिन्।
सनाले गुजरातमा मौलाना मुफ्ती अनससँग विवाह गरेको व्यापक चर्चा छ जसको एउटा भिडियो बाहिर आएको छ। मनोरञ्जन जगत्लाई ‘गुडबाई’ भन्दै उनले सामाजिक सञ्जालबाट आफ्ना पुराना सबै तस्बिर पनि डिलिट गरेकी थिइन्। पछि पोस्ट भएका सबै तस्बिरमा उनले मुख ढाक्ने पोसाक हिजाब लगाएकी छन्। हालका जोडी मौलानाकै अनुरोधमा उनले आफ्ना उत्तेजक तस्बिर हटाएको अनुमान गरिएको छ।
स्मरण रहोस्, सना खानको यसै वर्ष उनका प्रेमी मेलविन लुइससँग ब्रेकअप भएको थियो। उनले सामाजिक सञ्जालमा मेलविनले आफूलाई धोका दिएको आरोपसमेत लगाएकी थिइन्। उनले ब्रेकअपपछि आफू भित्रैदेखि टुटेको र निद्राको औषधिसमेत खानुपरेको बताएकी थिइन्।
सनाले सन् २००५ मा ‘ये है हाई सोसाइटी’ बाट बलिउडमा डेब्यु गरेकी थिइन्। त्यसपछि उनी टीभी कमर्सियल र थुप्रै विज्ञापनमा पनि देखिइन्। बलिउड छोड्ने बेलासम्म उनको बोल्ड अवतार चर्चामा रहन्थ्यो।
प्रतिक्रिया दिनुहोस !
