राजकुमार ह्यारीकी पत्नीको खुलासा: मेरो गर्भपतन भयो !
लण्डन : बेलायती राजपरिवारकी सदस्य तथा पूर्वयुवराज्ञी मेघन मर्केलले आफ्नो गर्भपतन भएको कुरा खुलासा गरेकी छन् ।
गएको समर सिजनमा उनको दोस्रो सन्तानको गर्भपतन भएको उनले बताएकी हुन् । न्युयोर्क टाइम्सको एक लेखमा मेघनले यस्तो खुलासा गरेकी हुन् । गत जुलाइमा ह्यारीसँगै लस एन्जलसमा रहेका बेला उनीहरुको सन्तान गर्भमै तुहिएको उनले जनाएकी हुन् ।
मेघनले बिहान छोरा आर्चीको हेरचाहबाट दिन सुरु भएको कुरा वर्णन गर्दै लेख सुरु गरेकी थिइन् । उनले आफ्नो छोरा आर्चीलाई सुमसुम्याउँदै गर्दा गर्भपतन भएको दोस्रो सन्तानको सम्झना भएको कुरा लेखमा उल्लेख गरेकी छन् ।
त्यस क्रममा आफू अस्पताल बस्नु परेको र अस्पतालको बेडबाटै पति ह्यारीको हात समातेको र आफूहरु दुबैजना रोएको कुरा लेखमा जनाएकी छन् । मेघन र ह्यारी गत वर्ष मात्रै बेलायतको राज दरबारबाट अलग भएर छोरा आर्चीसँगै क्यानडामा बस्दैआएका छन् । उनीहरुको परिवारमा सुमधुर सम्बन्ध नरहेको कुरा पनि बारम्बार बेलायती मिडियाले जनाउने गरेका छन् ।
एक डकुमेन्ट्रीमा त मेघनले आफू मिडियाबाट दिक्क भएको र मिडियाको दुनियाबाट टाढा बस्न मन लागेको भन्दै निराशा व्यक्त गरेकी थिइन् । यद्यपि केही मिडियाले भने ह्यारी र मेघनलाई परिवार र मिडियाबाट पनि तिरस्कृत पात्रको रुपमा अथ्र्याउने गरेका छन् ।
अमेरिकाको एक सामान्य परिवारमा जन्मिएकी मेघनले २०१८ को मे महिनामा बेलायती राजकुमार ह्यारीसँग विवाह गरेकी थिइन् । त्यसअघि उनी अमेरिकी टिभी रियालिटी शोकी एक अभिनेत्री थिइन् ।