बाइडेनको कार्यकालमा अमेरिकासँग सम्बन्ध सुध्रिने इरानको विश्वास
तेहरान : इरानी राष्ट्रपति हसन रौहानीले अमेरिकामा जो बाइडेन राष्ट्रपतिमा विजयी भएपछि अमेरिकासँग इरानको सम्बन्ध सुध्रिनेमा आशा व्यक्त गरेका छन् ।
उनले बाइडेनको कार्यकालमा डोनल्ड ट्रम्पभन्दा अघिको अवधिजस्तै सम्बन्ध सुमधुर हुनेमा विश्वास व्यक्त गरे । साथै यदी अमेरिकाले पहल गरेमा दुई देशको सम्बन्धमा कुनै समस्या नहुने पनि उनको भनाइ थियो ।
बाइडेनले ट्रम्पका गल्ती सुधार्ने कुरामा पनि रौहनीले विश्वास गरेका छन् । बुधबार उनले पत्रकार सम्मेलनको क्रममा यस्तो बताएका हुन् । २०१७ को जनवरीसम्म दुई देशले कायम गरेको सम्बन्ध जस्तै अब फेरि दुबै देशको पहलमा पुरानो सम्बन्ध फिर्ता हुनसक्ने उनले बताएका थिए ।
अमेरिकामा डोनल्ड ट्रम्प राष्ट्रपति बनेपछि इरानमाथि अमेरिकाले दबाब बढाएको इरानी राजनीतिज्ञहरु बताउँछन् । त्यसो त ट्रम्पले इरानमाथि नाकाबन्दी लगाउनुका साथै मुस्लिम वाहुल्य देशबाट अमेरिका प्रवेशमा समेत रोक लगाइदिएका थिए । सोही कारण रौहनी लगायत इरानी नेताहरु ट्रम्प प्रति रुष्ट हुने गरेका छन् ।
अमेरिकामा चुनाव हुनुअघि ट्रम्पले मुस्लिमविरोधी अधिव्यक्ति दिइरहँदा बाइडेनले भने आफू निर्वाचित भएपछि मुस्लिमहरुमाथि लगाइएको प्रतिबन्ध फुकुवा गर्ने प्रतिवद्धता व्यक्त गरेका थिए ।