भारतका किसानहरु आन्दोलितः सरकारको विरोधमा ५० हजार किसान दिल्ली जाँदै

नयाँदिल्ली : भारतमा दशौँ हजारको संख्यामा किसानहरु सरकारको विरोध गर्दै राजधानी दिल्लीतर्फ जाँदैछन् ।

५० हजारको संख्यामा हरियणाबाट उनीहरु दिल्लीतर्फ मार्च गरिरहेका हुन् । यस क्रममा प्रहरीले उनीहरुमाथि बल प्रयोग गरेको छ । प्रहरीसँग झडपको क्रममा प्रहरी टोलीले पानीको फोहोरा, टियर ग्यास र रबरका गोली समेत प्रहार गरेको छ । बिहीबार दिनभर प्रदर्शन गरेका उनीहरुलाई दिल्लीको सिमानामा पर्ने एउटा पुलबाट प्रहरीले अघि बढ्न दिएको छैन ।

किसान अगुवाहरुले यस आन्दोलनमा ५० हजार भन्दा धेरै किसान सहभागी भएको बताएका छन् । सत्तारुढ दल भाजपाले भने प्रतिपक्षी दल कंग्रेसलाई आफ्नो स्वार्थका लागि किसानलाई उचालेको आरोप लगाएको छ ।

किसानहरु भने विभिन्न माग गर्दै दिल्लीको सिमानामा बिहीबार साँझ अवेरसम्म धर्ना गरिरहेका थिए । किसानका विभिन्न संगठनको आह्वानमा विशाल प्रदर्शन उठेको हो । केही महिना अघिदेखि नै भारतका विभिन्न सहरमा किसानहरु सरकारको कृषि विधेयकको विरोधमा आन्दोलित बनेका थिए ।

यसै आन्दोलनलाई लिएर हरियणा र पन्जाबका मुख्यमन्त्रीहरुबीच मनमुटाब सुरु भएको छ । किसानको आन्दोलनलाई प्रहरीले बल प्रयोग गरी दबाएकोमा हरियाणाका मुख्यमन्त्री मनोहर लाल खट्टरलाई पन्जाबका मुख्यमन्त्रीले कडा आलोचना गरेका छन् ।

पन्जाबका मुख्यमन्त्री अमरेन्द्र सिंहले खट्टरलाई महामारीको बेलामा सस्तो राजनीति गरेको भन्दै आलोचना गरेका थिए । र मुद्दाबाट भागेर ट्वीट मात्रै गरिरहेको उनको भनाइ छ । आन्दोलनमा पन्जाब र हरियाणाका किसानहरु पनि सहभागी छन् । उनीहरुले केन्द्र सरकारसँग विभिन्न माग राख्दै दिल्लीसम्म मार्च गरिरहेका हुन् ।

बुधबारदेखि नै उनीहरुले दिल्लीका लागि मार्च गरेकोमा प्रहरीको अवरोधपछि सिमानामा रोकिएका छन् । तर बिहीबार दिउँसो दुई घण्टा लामो झडपको क्रममा ठूलो हताहत भएको बताइएको छ । दिल्लीको सिमाना नजिकै २०० किमि टाढा पर्ने पुलमा किसानहरु रोकिएका छन् । उत्तर प्रदेश, हरियाणा, उत्तराखण्ड, राजस्थान, केराला र पन्जाबका किसानहरु प्रदर्शनमा सहभागी छन् ।