बुटवल : बुटवलमा दैनिक तीन करोढ २० लाख लिटर पानी ल्याउने झुम्सा खानेपानी आयोजना निर्माण थालिएको छ ।
पाल्पाको तिनाउ गाउँपालिकास्थित झुम्सा खोलाबाट यो पानी बुटवल ल्याउन लागिएको छ । यो हिउँदमा पनि निरन्तर बगिरहने खोला हो । विगत केही वर्षदेखि झुम्साबाट पानी ल्याउने योजनामा काम भइरहे पनि त्यसले मूर्त रुप पाएको थिएन । ‘बुटवलको मेलन्ची’भन्ने आरोप लागेको यो योजना अव भने द्रुत गतिमा अघि बढ्ने अपेक्षा गरिएको छ ।
बुटवलमा अहिले खानेपानीको अभाव छ । यहाँबाट प्रारम्भिक चरणमा ३ करोड २० लाख लिटर र आयोजना निर्माण सकिएपछि दैनिक ६ करोड लिटर पानी आउने बुटवल खानेपानी आयोजनाले जनाएको छ ।
अहिले बुटवलमा दैनिक ३ करोड ४० लाख लिटर पानीको माग रहेको छ । खानेपानी संस्थानसहित विभिन्न उपभोक्ता समितिका खानेपानी योजनाबाट २ करोड ८० लाख लिटर उत्पादन र वितरण भएको छ । ६० लाख लिटर पानी अपुग रहेको बुटवललाई झुम्सा योजनाले पूर्ति गर्ने संस्थानले जनाएको छ ।
बुटवलमा अहिले तिनाउ नदीबाट पम्प गरिएको र ट्वुवेलको पानी वितरण गर्ने गरिएको छ । तिनाउबाट तानिने पानी वर्खायाममा धमिलो हुदा यहाका नागरिकले सास्ती बेहोर्दै आएका छन् ।
संस्थानले पाल्पाको झुम्साबाट पानी ल्याएर माग अनुरुप नै वितरण गर्ने योजना बनाएको छ । ६ अर्ब ३५ करोड ३५ लाखको लागतमा आयोजना निर्माण थालिएको हो । नेपाल खानेपानी संस्थानका महाप्रवन्धक भूपेन्द्र प्रसादले झुम्सा खानेपानी आयोजनाले आगामी १५ वर्षसम्मको बुटवलको खानेपानीको माग धान्ने बनाए । संस्थानले निकै महत्वका साथ आयोजनालाई अगाडी बढाएको उनले बताए ।
झुम्साको पानी बुटवल ल्याउन १० इन्च र २० इन्चको साढे १३ किलोमिटर पाइपलाइन विस्तार गरिनेछ । झुम्सा खोलामा पक्की बाध र पानी थिग्रयाउने तथा पानी जम्मा गर्ने पूर्वाधार निर्माण हुने आयोजनाले जनाएको छ । बुटवलका ८ वटा वडामा ५ लाखदेखि १० लाख लिटरसम्मका ९ वटा ट्यांकी निर्माण गरिनेछ ।
बाँध निर्माणका लागि ७३ करोड ६४ लाख बजेट बिनियोजन गरिएको छ । पानी प्रशोधन, भण्डारण र वितरणका लागि ५ अर्ब ६१ करोड ७१ लाख रकम बिनियोजन गरिएको छ । यो आयोजना ०७९ जेठ महिनामा सक्ने गरी निर्माण कम्पनीसँग सम्झौता गरिएको छ ।
झुम्सा खोलामा निर्माण हुने बाँधको बिहिबार अर्थमन्त्री विष्णु पौडेलले शिलान्यास गरेका छन् । सो अवसरमा बोल्दै मन्त्री पौडेलले झुम्सा खानेपानी बुटवलको लागि महत्वपूर्ण आयोजना भएकाले गुणस्तरीय रुपमा समयमै सक्नुपर्ने बताए । 'यसका लागि बजेटको अभाव हुनेछैन, खानेपानी संस्थानले महत्वका साथ यो योजनाको काम गर्नेछ,' उनले भने ।
खानेपानी तथा सरसफाई मन्त्रालयका सचिव माधव बेल्बासेले मन्त्रालयले झुम्सा खानेपानी आयोजनालाई महत्वका साथ केन्द्रीय कार्यक्रममा राखेको बताए । यो योजनाले तिब्र शहरीकरण भएको बुटवलको खानेपानी मागको पूर्ति गर्ने बताए ।
प्रतिक्रिया दिनुहोस !
