काठमाडौं : बेलायत निवासी दिप्ता थापाको स्वर रहेको गीत ‘यो जिन्दगी’ सार्वजनिक भएको छ। म्युजिक भिडियोसमेत बनेको गीत बेलायतका लागि नेपाली राजदूत डा. दुर्गाबहादुर सुवेदी ‘दुबसु’ ले एक समारोहबीच सार्वजनिक गरेका हुन्।
शिखर सन्तोषको संगीत रहेको गीतमा सञ्जित देउजाको शब्द छ। गीतको भिडियोमा पनि गायिका दिप्ता नै देखिएकी छन्। यसको कोरियोग्राफी उनकै आमा सुनिता गौतमले गरेकी छन्।
भिडियोमा छायांकन, सम्पादन र निर्देशन कुशल श्रेष्ठको रहेको छ। गीत र भिडियोले प्रवासमा हुर्किएका नयाँ पुस्तालाई नेपाली गीतसंगीतमा लाग्न साथै कला, संस्कृतिको संरक्षण गर्न प्रेरित गर्ने विश्वास आफूले लिएको दिप्ताले बताइन्।
कृष्ण र रचनाको ‘चाखुम चाखुम’
कृष्ण काफ्ले र रचना रिमालको आवाजमा रहेको नयाँ गीत ‘चाखुम चाखुम’ सार्वजनिक भएको छ। अम्बिका गुरुङको शब्द र अर्जुन पोख्रेलको संगीत रहेको गीतको भिडियोमा रामजी लामिछानेको कोरियोग्राफी र निर्देशन छ। गीतको भिडियोमा सरोज अधिकारी र आश्मा विश्वकर्मा फिचर्ड छन्। सौरभ लामाले खिचेको भिडियो विकास दाहालले सम्पादन गरेका हुन्।
प्रतिक्रिया दिनुहोस !
