काठमाडौं : गायक यम बराल र गायिका उर्मिला लाम्गादेको युगल गायनमा रहेको ‘जवानी ताजा ताजा छ’ गीतको म्युजिक भिडियो सार्वजनिक भएको छ। प्रेमिल शैलीको गीतका शब्द आनन्द अधिकारीले लेखेका हुन् भने शिखर सन्तोषले संगीतबद्ध गरेका हुन्। गीतलाई मोहित मुनालले संगीत संयोजन गरेका छन्।
गीतको म्युजिक भिडियोमा नाजिर हुसेन र उषा उप्रेतीको अनस्क्रिन प्रेम र रोमान्स देख्न सकिन्छ। रवीन्द्र न्यौपानेले छायांकन गरेको भिडियोलाई दीपेन्द्र शाही ठकुरीले कोरियोग्राफी गरेका हुन्। भिडियोमा टेकेन्द्र शाहको सम्पादन रहेको छ। ओएसआर डिजिटलमार्फत सार्वजनिक गरिएको भिडियो सुदीप बरालको निर्देशनमा तयार पारिएको हो।
१३ वर्षपछि गायन यात्रामा फर्किएकी लाम्गादेले केही महिनाअघि ‘लिन आउँछु भन्थ्यौ’ बोलको गीत सार्वजनिक गरेकी थिइन्। न्युयोर्कमा बसेर आफ्नो संगीत यात्रालाई अघि बढाइरहेकी गायिका लाम्गादे गायनसँगै अभिनयमा समेत रुचि राख्छिन्। उनले यसअघि ‘दलन’ नामक टेलिचलचित्र र चेतनामूलक विज्ञापनहरूमा अभिनय गरिसकेकी छन्।
प्रतिक्रिया दिनुहोस !
