वासिंटन: अमेरिकन कंग्रेसका रिपब्लिकन सांसदहरुले पोर्नसाइट 'पोर्नहब'माथि छानविन गर्नुपर्ने भन्दै आवाज उठाएका छन् ।
न्युयोर्क टाइम्सले हालै उक्त साइटले बलात्कार गरेको 'सेक्स भिडियो' सार्वजनिक गरेको कुरा उल्लेख गरेपछि सांसदहरुले छानविनको माग गरेका हुन् । न्युयोर्क टाइम्समा भने पुलित्जर पुरस्कार विजेत समेत रहेका निकोलस क्रिस्टोफले आफ्नो स्तम्भमा यस्तो दावी गरेका थिए ।
निकोलसले आफ्नो लेख 'पोर्नहबका बालबालिका' शिर्षकमार्फत पोर्नहबले बलात्कार सम्बद्ध भिडियो समेत सार्वजनिक गरेको दावी गरेका थिए । पोर्नहबले बालबालिकालाई समेत भिडियोमा प्रयोग गरेर शोषण गरेको भन्दै उक्त कम्पनीमाथि कडा आलोचना गरेका छन् ।
साथै उक्त कम्पनीले बालबालिकाको बलात्कार, बदलामा आधारित पोर्नोग्राफी, जासूसी क्यामेराबाट खिचिएका भिडियो, रंगभेदी सामग्रीलाई प्रवर्द्धन गर्ने भिडियो बनाउने गरेको भन्दै क्रिस्टोफले लेखमार्फत टिप्पणी गरेका छन् ।
भिडियोमा अधिकांश बालिका शोषित नभए पनि थुप्रै बालिकामाथि शोषण हुने गरेको सवाल उनले उठाएका छन् । क्रिस्टोफले केही किशोरीहरुको व्यक्तिगत जीवनकथाबारे समेत लेखमा उल्लेख गरेका छन् ।
पोर्नहबलाई बलात्कार, यौन शोषण र दुर्व्यवहारबाट पैसा कमाउने गरेको भन्दै त्यस्तो गर्नु स्वीकार्य नभएको पनि क्रिस्टोफले जनाएका छन् । न्युयोर्क टाइम्समा प्रकाशित उक्त लेखमा पोर्नहबमाथि यस्तो प्रश्न उठेपछि सांसद र मानवअधिकारकर्मीहरुले समेत प्रश्न उठाउन थालेका छन् ।
पोर्नहबले भने कम उमेरकाहरुमाथि यौन दुर्व्यवहार भएको कुरालाई बारम्बार अस्वीकार गर्दैआएको छ । साथै विज्ञप्ति निकाल्दै यो पेशा सुरक्षित रुपमा गराएको पनि दावी गरेको छ ।
प्रतिक्रिया दिनुहोस !
