राज सिग्देलको स्वर र मंगल बिकको संगीतमा 'पैसा पैसा' सार्वजनिक(भिडियो)

काठमाडौँ: गीतकार उषा केसी पोखरेलको 'पैसा पैसा' बोलको गीत यही साता सार्वजनिक भएको छ ।

फरक स्वादमा सिर्जना गरिएको आधुनिक गीतमा मंगल बिकले संगीत भरेका हुन् भने राज सिग्देलको स्वर छ । गीतकार उषाले गीतमार्फत पैसाको पछाडि दौडिने आधुनिक समाजको मनोदशा प्रकट गरेकी छन् ।

पैसा हुँदा र नहुँदाको अवस्थालाई उनले गीतमा दर्शाएकी छन् । जीवनभर खुसी र स्वाभिमानलाई समेत पैसाको लागि दाउमा लगाउने युवाहरुको मनोविज्ञान पनि गीतमार्फत झल्किएको छ ।

पैसालाई नै सर्वस्व ठान्दा मानिसको सारा खुसी नै कसरी लुटिन्छ भन्ने सवाल नै गीतको मर्म हो । यस्तै गजल गायनमा विशेष पहिचान बनाएका गायक राज सिग्देल र संगीतकार मंगल बिकको संगीतले गीतको शब्दमा तालमेल मिलेको देखिन्छ ।

संगीतकार मंगल भने स्वयं गायक पनि हुन् । गीतको भावना र मर्मलाई उनले सुन्दर ढंगले समेटेका छन् । म्युजिक भिडियोमा प्रमुख अभिनय अभिनेता गौरब पहारीको छ । उनीसँगै समरा जोशी र जोर्डन राजभण्डारी पनि देखिन्छन् ।

गौरबलाई म्युजिक भिडियोमा दुई भिन्न भूमिकामा देखाइएको छ । निकेश खड्काले म्युजिक भिडियो निर्देशन गरेका हुन् । छायांकन बुद्ध थापा र विकास धमलाको छायांकन हो । बिमल डांगी युट्युब च्यानलमार्फत गत सोमबार म्युजिक भिडियो सार्वजनिक भएको हो ।