नाइजेरियामा वेपत्ता ३०० बालबालिका अझै फर्किएनन्, अपहरणको आशंका

नाइजेरिया: नाइजेरियाको उत्तरपूर्वी कातसिना राज्यस्थित कंकारामा रहेको एक स्कुलका हतियारधारी समूहको आक्रमणपछि वेपत्ता भएका ३ सय बालकहरु अझै सम्पर्कमा आएका छैनन् ।

दुई दिनसम्म पनि सम्पर्कविहीन भएपछि उनीहरुलाई हतियारधारी समूहले अपहरण गरेको हुनसक्ने बताइएको छ ।

शुक्रबार साँझ मोटरसाइकलमा आएका हतियारधारी समूहले आक्रमण गर्न थालेपछि ८६९ विद्यार्धी अध्ययनरत उक्त स्कुलका अरु बालबालिका भागेर ज्यान जोगाउन सफल भएका थिए । ती विद्यार्थीहरुमध्ये केहीले स्कुलबाट भागेर नजिकैको जंगलमा लुकेर ज्यान जोगाएका थिए ।

तर ३३३ विद्यार्धीहरु अझै सम्पर्कमा नआएको कातसिना राज्यका गभर्नर अमिनु मसारीले बताएका छन् । मसारीका अनुसार ती बालबालिकाहरु सशस्त्र समूहबाट अपहरित भएका छन् । साथै उनीहरुको उद्वारको लागि प्रयास गरिएको उनले बताए ।

बालबालिकाका अभिभावक तथा आफन्तहरुले स्कुलमा भेला भएर बालबालिकाको खोजी गरिदिन सरकार समक्ष आग्रह गरिरहेका छन् । साथै सरकारले बच्चाहरुको उद्वार नगरिदिए आफूहरुसँग कुनै उपाय नभएको अभिभावकहरुले अनुरोध गरिरहेका छन् । यस्तै रक्षामन्त्री मेजर जनरल बशिर अलिही मोगासले सेनाले उनीहरुको खोजी र उद्वारको प्रयास गरिरहेको जानकारी दिए ।

यसअघि २०१८ मा पनि नाइजेरियाको उत्तरपूर्वी क्षेत्र डाप्ची सहरस्थित सशस्त्र समूह बोको हरामले १०० स्कुले बालिकालाई अपहरण गरेको थियो । ६ वर्षअघि २०१४ मा पनि २७० स्कुले बालिकालाई बोको हराम समूहले नै अपहरण गरेको थियो । यस्तै २ साताअघि मात्रै नाइजेरियामै सशस्त्र समूहको आक्रमणबाट १ सय भन्दा धेरै किसान मारिएका थिए । यस पटकको घटनाको जिम्मेवारी भने अहिलेसम्म कुनै समूहले लिएको छैन ।